चाळीसगाव–संभाजीनगर रेल्वे मार्ग ठप्प; नागरिकांत नाराजी

चाळीसगाव–संभाजीनगर रेल्वे मार्ग ठप्प; नागरिकांत नाराजी

९३ किमी प्रकल्पाचे सर्वेक्षण पूर्ण, मात्र पुढील कामकाज रखडले

चाळीसगाव : गेल्या अनेक दशकांपासून प्रलंबित असलेला चाळीसगाव – छत्रपती संभाजीनगर रेल्वेमार्ग प्रकल्प पुन्हा एकदा ठप्प अवस्थेत आहे.

९३ किमी लांबीच्या या लोहमार्गासाठी सर्वेक्षण पूर्ण झाले असले तरी पुढील कामकाज सुरू न झाल्याने नागरिकांमध्ये नाराजी व्यक्त होत आहे.

सर्वेक्षण पूर्ण; पुढील कार्यवाही गायब

रेल्वे बोर्डाकडून या प्रकल्पासाठी निधी मंजूर करून हेलिकॉप्टरद्वारे सर्वेक्षणही पूर्ण करण्यात आले. त्याचा अहवाल रेल्वे मंत्रालयाकडे सादर झाला असला तरी प्रत्यक्ष कामाला अद्याप गती मिळालेली नाही. त्यामुळे अनेक वर्षांपासूनच्या अपेक्षा अधांतरी राहिल्या आहेत.

बीड-सम्भाजीनगर प्रकल्पाला गती, मात्र येथे शांतता

दरम्यान, बीड – संभाजीनगर रेल्वे प्रकल्पाला गती मिळत असून भूसंपादन प्रक्रियाही सुरू झाली आहे. याउलट चाळीसगाव–संभाजीनगर मार्गाबाबत कोणतीही हालचाल दिसून येत नसल्याने ‘तोंडाला पाने पुसण्याची’ वेळ येऊ नये, अशी भावना नागरिकांकडून व्यक्त केली जात आहे.

चाळीसगाव जंक्शनचे वाढते महत्त्व

हा रेल्वेमार्ग पूर्ण झाल्यास चाळीसगाव जंक्शनचे महत्त्व मोठ्या प्रमाणात वाढणार आहे. खान्देशातील प्रमुख रेल्वे केंद्र म्हणून या स्थानकातून मराठवाड्याशी थेट संपर्क प्रस्थापित होईल. परिणामी उद्योग, व्यापार आणि सेवा क्षेत्राला मोठी चालना मिळण्याची शक्यता वर्तवली जात आहे.

प्रस्तावित मोठ्या प्रकल्पाशी जोडणी

धाराशिव – बीड – संभाजीनगर असा सुमारे २४० किमी लांबीचा प्रस्तावित रेल्वेमार्ग पूर्ण झाल्यास उत्तर व दक्षिण रेल्वे विभागांमध्ये थेट जोडणी होणार आहे. या पार्श्वभूमीवर चाळीसगाव मार्गाचे महत्त्व अधिक अधोरेखित होत आहे.

नागरिकांचा हिरमोड; अपेक्षा कायम

बीड प्रकल्पासाठी बैठकाही पार पडत असताना चाळीसगाव–संभाजीनगर मार्गाबाबत कोणतीच ठोस हालचाल होत नसल्याने नागरिकांचा हिरमोड झाला आहे. मात्र, अमृत भारत योजना अंतर्गत चाळीसगाव रेल्वे स्थानकाचा कायापालट सुरू असल्याने भविष्यात हे स्थानक महत्त्वाचे रेल्वे केंद्र बनेल, अशी अपेक्षा व्यक्त होत आहे.