चिनावल ग्रामपंचायतीकडून ऐतिहासिक पाऊल : महात्मा गांधी तंटामुक्ती कार्यालयाचे उद्घाटन उत्साहात संपन्न

चिनावल ग्रामपंचायतीकडून ऐतिहासिक पाऊल : महात्मा गांधी तंटामुक्ती कार्यालयाचे उद्घाटन उत्साहात संपन्न

सावदा – गावातील वादविवाद गावपातळीवरच शांततेने आणि सामंजस्याने निकाली काढण्यासाठी चिनावल ग्रामपंचायतीने एक ऐतिहासिक निर्णय घेत महात्मा गांधी तंटामुक्ती कार्यालयाची स्थापना केली असून, या कार्यालयाचे उद्घाटन आज, रविवार दिनांक ३१ ऑगस्ट २०२५ रोजी सकाळी १०.३० वाजता उत्साहात पार पडले.

या उद्घाटनप्रसंगी सावदा पोलीस स्टेशनचे सहाय्यक पोलीस निरीक्षक (सपोनि) विशाल पाटील यांच्या हस्ते आणि ग्रामपंचायत सरपंच सौ. ज्योती संजय भालेराव यांच्या अध्यक्षतेखाली कार्यक्रम संपन्न झाला. यावेळी गावकऱ्यांनी मोठ्या संख्येने उपस्थित राहून उपक्रमाला भरभरून प्रतिसाद दिला.

सावदा पोलीस ठाण्याच्या कार्यक्षेत्रातील ३२ गावांमध्ये चिनावल ही पहिली ग्रामपंचायत ठरली आहे, जिथे तंटामुक्ती समितीचे स्वतंत्र कार्यालय सुरू करण्यात आले आहे. यामुळे स्थानिक पातळीवरच छोट्या-मोठ्या वादांचे निरसन सहजपणे, न्याय्य व पारदर्शक रीतीने करता येणार आहे. या उपक्रमामुळे गावातील सामाजिक सलोखा, शांतता आणि एकोपा अधिक दृढ होईल, असे प्रतिपादन सपोनि विशाल पाटील यांनी यावेळी केले.

कार्यक्रमात महात्मा गांधी तंटामुक्ती समितीचे अध्यक्ष जितेंद्र नेमाडे, पोलीस पाटील निलेश नेमाडे, तनुजा सरोदे, माजी जि.प. सदस्य पुष्पा तायडे, उपसरपंच शाहीनबी शेख, माजी सरपंच भावना बोरोले, माजी जि.प. सदस्य सुरेखा पाटील, माजी सभापती माधुरी नेमाडे, माजी पं.स. सदस्य गोपाळ नेमाडे, माजी सरपंच चंद्रकांत भंगाळे, योगेश बोरोले, उज्वला भंगाळे, सुरेश गारसे, दामोदर महाजन, ठकसेन पाटील आदी मान्यवरांची उपस्थिती लाभली.

तसेच पोलीस विभागातर्फे पोलीस उपनिरीक्षक राहुल सानप, बिट अंमलदार विनोद पाटील, सुनील जोशी, मझहर पठाण, निलेश बावीस्कर, राजेश बोदडे, मयुर पाटील, राहुल येवले यांच्यासह पोलीस स्टेशनचा कर्मचारी वर्गही कार्यक्रमास उपस्थित होता. यावेळी सपोनि पाटील यांनी तंटामुक्ती समितीच्या पुढाकाराचे कौतुक करत अध्यक्ष जितेंद्र नेमाडे यांना शुभेच्छा दिल्या.

कार्यक्रमात गावातील विविध गणेशोत्सव आणि दुर्गोत्सव मंडळांचे पदाधिकारी, महिलावर्ग, युवकवर्ग आणि ग्रामस्थ मोठ्या संख्येने सहभागी झाले होते. ग्रामपंचायतीच्या या उपक्रमामुळे गावकऱ्यांना स्थानिक न्यायनिवाडा प्रक्रियेत सुलभता, पारदर्शकता आणि जलद निर्णय मिळण्याची अपेक्षा व्यक्त करण्यात आली आहे.