चोपडा पालिकेकडून कर वसुलीसाठी ‘अभय योजना’ जाहीर

चोपडा पालिकेकडून कर वसुलीसाठी ‘अभय योजना’ जाहीर

व्याज व दंडावर १०० टक्के सूट; २५ मार्चपर्यंत नागरिकांना संधी

चोपडा | प्रतिनिधी : चोपडा नगरपरिषदेमार्फत शहरातील नागरिकांना दिलासा देण्यासाठी निवासी मालमत्तांसाठी विशेष ‘अभय योजना’ जाहीर करण्यात आली आहे. या योजनेअंतर्गत नागरिकांनी थकीत पाणीपट्टी व मालमत्ता कर एकरकमी भरल्यास मालमत्ता करावरील व्याज आणि दंडावर १०० टक्के सूट देण्यात येणार आहे. ही योजना २५ मार्चपर्यंत लागू राहणार असून नागरिकांनी या कालावधीत थकीत कर भरून सवलतीचा लाभ घ्यावा, असे आवाहन पालिका प्रशासनाने केले आहे.

थकीत कर वसुलीसाठी विशेष उपक्रम
नगरपरिषदेच्या नोंदीनुसार शहरातील अनेक निवासी मालमत्ताधारकांकडे मागील काही वर्षांपासून मालमत्ता कर व पाणीपट्टी थकीत आहे. नागरिकांना आर्थिक दिलासा देत थकबाकी नियमित करण्यासाठी तसेच नगरपरिषदेच्या विकासकामांना गती देण्यासाठी ही विशेष अभय योजना राबवण्यात येत आहे. या माध्यमातून पालिकेची थकीत वसुली वाढण्यासही मदत होणार आहे.

योजनेचा लाभ न घेतल्यास कारवाईची शक्यता
प्रशासनाने दिलेल्या माहितीनुसार, या योजनेचा लाभ न घेतल्यास पुढील काळात थकबाकीदारांवर नियमानुसार वसुलीची कडक कारवाई केली जाऊ शकते. त्यामुळे नागरिकांनी शेवटच्या क्षणाची वाट न पाहता नगरपरिषद कार्यालयात किंवा संबंधित विभागात जाऊन कर भरावा, असेही प्रशासनाकडून स्पष्ट करण्यात आले आहे.

“चोपडा शहराच्या सर्वांगीण विकासासाठी नगरपरिषद सातत्याने प्रयत्नशील आहे. नागरिकांना आर्थिक दिलासा देण्यासाठी ही अभय योजना सुरू करण्यात आली असून व्याज व दंडावर १०० टक्के सूट ही मोठी संधी आहे. शहरातील सर्व निवासी मालमत्ताधारकांनी या योजनेचा लाभ घ्यावा.”
— नम्रता सचिन पाटील, नगराध्यक्षा, चोपडा नगर परिषद

“२५ मार्चपूर्वी थकीत पाणीपट्टी व मालमत्ता कर एकरकमी भरल्यास मालमत्ता करावरील व्याज व दंडावर १०० टक्के सूट दिली जाणार आहे. नागरिकांनी या अभय योजनेचा लाभ घ्यावा.”
— रामनिवास झंवर, मुख्याधिकारी, चोपडा नगर परिषद