चोपडा येथे पालकमंत्र्यांच्या हस्ते ५.५० कोटींच्या विकासकामांचे भूमिपूजन; बहिणाबाई मार्टमुळे महिलांना चालना

चोपडा येथे पालकमंत्र्यांच्या हस्ते ५.५० कोटींच्या विकासकामांचे भूमिपूजन; बहिणाबाई मार्टमुळे महिलांना चालना
चोपडा : शहरातील विविध विकासकामांना गती देत पालकमंत्री गुलाबराव पाटील यांच्या हस्ते शनिवारी सकाळी सुमारे १०.३० वाजता ५ कोटी ५० लाख रुपयांच्या कामांचे भूमिपूजन करण्यात आले. यामध्ये महिला बचत गटांसाठी बहिणाबाई मार्ट व्यापारी संकुल, उद्यान विकास तसेच ‘नमो उद्यान’ प्रकल्पांचा समावेश आहे.

या अंतर्गत २.२० कोटी रुपयांत बहिणाबाई मार्ट उभारण्यात येणार असून, सुमारे २६५ महिला बचत गटांना याचा थेट लाभ होणार आहे. याशिवाय बोरोले नगर २ व पंडित कॉलनी परिसरात २ कोटींच्या निधीत उद्यान विकसित करण्यात येणार आहे. तसेच शहरातील खुल्या जागांवर १ कोटींच्या खर्चातून ‘नमो उद्यान’ उभारण्यात येणार आहे.

नगरपालिकेच्या आवारात झालेल्या कार्यक्रमास आमदार प्रा. चंद्रकांत सोनवणे, नगराध्यक्षा नम्रता पाटील, डॉ. स्मिता पाटील, नरेंद्र पाटील, उपनगराध्यक्ष पंकज बोरोले, गटनेते पीयूष चौधरी, मुख्याधिकारी रामनिवास झंवर यांच्यासह अनेक पदाधिकारी उपस्थित होते.

आ. चंद्रकांत सोनवणे यांनी शहरातील अपूर्ण रस्त्यांची कामे पुढील चार वर्षांत पूर्ण केली जातील, असा विश्वास व्यक्त करत नागरिकांनी नळ व गटारींच्या जोडण्या वेळेत पूर्ण कराव्यात, असे आवाहन केले. तसेच १६० कोटींच्या रिंगरोड प्रकल्पासाठी प्रयत्न सुरू असल्याचेही त्यांनी सांगितले.

पालकमंत्री गुलाबराव पाटील यांनी बहिणाबाई मार्ट ही संकल्पना राज्यभर ‘जळगाव मॉडेल’ म्हणून स्वीकारली गेल्याचे सांगत महिला सक्षमीकरणासाठी सरकार कटिबद्ध असल्याचे स्पष्ट केले.

महिन्याभरात दोन दिवसाआड पाणी :
आ. सोनवणे यांनी सांगितले की, पूर्वी १२ दिवसांनी मिळणारा पाणीपुरवठा आता चार दिवसाआड झाला असून, येत्या महिनाभरात तो दोन दिवसाआड करण्याचा मानस आहे.

खेडी-भोकरी पूल ६ महिन्यांत :

खेडी-भोकरी-भोकर पूलाचे काम पुढील सहा महिन्यांत सुरू होईल, असा विश्वास पालकमंत्र्यांनी व्यक्त केला. यावेळी त्यांनी विरोधकांवर टीका करत पूर्वीच्या सत्ताधाऱ्यांनी विकासकामांकडे दुर्लक्ष केल्याचा आरोप केला.
चोपडा शहराच्या सर्वांगीण विकासासाठी प्रशासन प्रयत्नशील असून आगामी काळात अधिक कामांना गती दिली जाईल, असा विश्वास यावेळी व्यक्त करण्यात आला.