चोपड्यात तंत्रनिकेतनाच्या कॅम्पस प्लेसमेंटला मोठे यश

चोपड्यात तंत्रनिकेतनाच्या कॅम्पस प्लेसमेंटला मोठे यश

५१ विद्यार्थ्यांची नामांकित कंपन्यांमध्ये निवड; उज्ज्वल करिअरची संधी

चोपडा : महात्मा गांधी शिक्षण मंडळ संचलित श्रीमती शरच्चंद्रिका सुरेश पाटील इन्स्टिट्यूट ऑफ टेक्नॉलॉजी (इंजिनिअरिंग व पॉलिटेक्निक) महाविद्यालयात आयोजित कॅम्पस प्लेसमेंट उपक्रमात विद्यार्थ्यांनी उल्लेखनीय यश संपादन केले. या प्रक्रियेत एकूण ५१ विद्यार्थ्यांची नामांकित कंपन्यांमध्ये निवड झाली आहे.

निवड झालेल्या विद्यार्थ्यांमध्ये विद्युत विभागाचे ३३, यांत्रिकी विभागाचे १० आणि आयटीआयचे ८ विद्यार्थ्यांचा समावेश आहे. ही भरती प्रक्रिया शेफ्लर इंडिया प्रा. लि. आणि रँडस्टॅड इंडिया यांच्या माध्यमातून पार पडली.

या वेळी शेफ्लर इंडिया लिमिटेडचे प्रॉडक्शन हेड वसंत डोएबोले आणि एचआर मॅनेजर शहाजी माने यांनी विद्यार्थ्यांना कंपनीच्या कार्यपद्धती व करिअर संधींबाबत सविस्तर माहिती दिली. तसेच रँडस्टॅड इंडियाचे विलास आव्हाळे यांनीही विद्यार्थ्यांना मार्गदर्शन केले. कार्यक्रमाला इन-प्लांट एचआर सागर दाऊने यांचीही उपस्थिती होती.

प्राचार्य व्ही. एन. बोरसे यांनी विद्यार्थ्यांना मार्गदर्शन करताना केवळ नोकरी मिळविण्यावर न थांबता सतत कौशल्यविकासावर भर देण्याचे आवाहन केले. उद्योग क्षेत्रातील बदल लक्षात घेऊन स्वतःला अद्ययावत ठेवणे आवश्यक असल्याचे त्यांनी सांगितले.

या कार्यक्रमास संस्थेचे अध्यक्ष भैय्यासाहेब आणि संदीप सुरेश पाटील तसेच सचिव डॉ. स्मिता संदीप पाटील यांचे मार्गदर्शन लाभले. सर्व विभागप्रमुख व आयटीआयचे प्राचार्य यावेळी उपस्थित होते.

कार्यक्रमाचे सूत्रसंचालन धनराज आर. पाटील यांनी केले, तर आभार प्रदर्शन पी. के. चौधरी यांनी केले. संपूर्ण उपक्रमाचे यशस्वी आयोजन ट्रेनिंग अँड प्लेसमेंट ऑफिसर भूषण जे. पवार यांनी केले.