चोपड्यात मोठी कारवाई : साडेसहा किलो ओला गांजासह तरुण अटकेत, दुचाकीही जप्त

चोपड्यात मोठी कारवाई : साडेसहा किलो ओला गांजासह तरुण अटकेत, दुचाकीही जप्त

चोपडा | प्रतिनिधी

चोपडा तालुक्यातील गलंगी परिसरात गांजाची अवैधरित्या वाहतूक करणाऱ्या एका तरुणाला चोपडा ग्रामीण पोलिसांनी अटक केली असून, या कारवाईत सुमारे दीड लाख रुपये किमतीचा साडेसहा किलो ओला गांजा आणि एक दुचाकी जप्त करण्यात आली आहे. ही कारवाई बुधवारी दुपारी सापळा रचून करण्यात आली.

संशयित आरोपी इनेश रेगड्या पावरा (वय ३५, रा. बेलाने, ता. चोपडा) हा गांजाची वाहतूक करत असल्याची गोपनीय माहिती पोलीस निरीक्षक कावेरी कमलाकर यांना मिळाल्यानंतर त्यांनी तातडीने विशेष पथकाला कारवाईचे आदेश दिले. त्यानुसार २१ मे रोजी दुपारी १२ वाजेच्या सुमारास गलंगी परिसरात सापळा रचण्यात आला आणि इनेश पावरा याला अटक करण्यात आली.

त्याची झडती घेतली असता त्याच्याकडे सुमारे ६.५ किलो ओला गांजा आढळून आला. त्यासोबतच वाहतुकीसाठी वापरलेली दुचाकीही जप्त करण्यात आली आहे.

या प्रकरणी पोलीस कॉन्स्टेबल गजानन पाटील यांच्या फिर्यादीवरून आरोपीविरुद्ध एनडीपीएस कायद्यांतर्गत गुन्हा दाखल करण्यात आला आहे. या कारवाईचा पुढील तपास सहाय्यक पोलीस निरीक्षक शेषराव नितनवरे करत आहेत.