चोरगाव शिवारात १२ मेंढ्यांचा अकस्मात मृत्यू

चोरगाव शिवारात १२ मेंढ्यांचा अकस्मात मृत्यू

पशुवैद्यकीय पथकाची तत्काळ धाव; अनेक मेंढ्या वाचवल्या

वराड, ता. धरणगाव : चोरगाव शिवारात तात्पुरता मुक्काम केलेल्या मेंढपाळांच्या कळपातील तब्बल १२ मेंढ्यांचा अचानक मृत्यू झाल्याने परिसरात खळबळ उडाली आहे. या घटनेनंतर पशुवैद्यकीय अधिकाऱ्यांनी तातडीने घटनास्थळी धाव घेत उपचार सुरू केल्याने उर्वरित अनेक मेंढ्यांना वाचवण्यात यश आले आहे.
मिळालेल्या माहितीनुसार, धुळे जिल्ह्यातील लोटन सुखा शिंदे व भिका लहानू बुरंगले हे मेंढपाळ चोरगाव शिवारातील गौरव पवार यांच्या शेतात मुक्कामाला होते. त्यांच्या कळपातील सुमारे ४७ मेंढ्या चारण्यासाठी जवळील एका शेतकऱ्याच्या गव्हाच्या शेतात नेण्यात आल्या होत्या. तेथून परत आल्यानंतर रात्रीच्या मुक्कामादरम्यान मेंढ्यांची प्रकृती अचानक बिघडू लागली.
काही वेळातच एकामागून एक मेंढ्या मृत्युमुखी पडू लागल्याने मेंढपाळांमध्ये भीतीचे वातावरण निर्माण झाले. घटनेची माहिती मिळताच पशुवैद्यकीय विभागाचे अधिकारी तत्काळ घटनास्थळी दाखल झाले व उर्वरित मेंढ्यांवर उपचार सुरू केले. वेळेत उपचार मिळाल्यामुळे अनेक मेंढ्यांचे प्राण वाचवण्यात यश आले.
दरम्यान, मेंढ्यांच्या मृत्यूमागचे नेमके कारण अद्याप स्पष्ट झाले नसून विषबाधा किंवा आजाराचा संशय व्यक्त केला जात आहे. पशुवैद्यकीय विभागाकडून पुढील तपास सुरू असून अहवालानंतरच मृत्यूचे खरे कारण स्पष्ट होणार आहे.