चोरीच्या संशयावरून तरुणाला बेदम मारहाण

चोरीच्या संशयावरून तरुणाला बेदम मारहाण

लाकडी दांडक्याने व लोखंडी आसारीने हल्ला; तिघांविरुद्ध गुन्हा

जळगाव : चोरी केल्याच्या संशयावरून एका तरुणाला बेदम मारहाण केल्याची घटना पिंप्राळा हुडको परिसरात घडली असून या प्रकरणी तिघांविरुद्ध रामानंद नगर पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, उस्मानिया पार्क परिसरातील रहिवासी हमीद अब्बास खाटीक यांचा मुलगा अबरार उर्फ चिरक्या हमीद खाटीक (वय १९) याच्यावर चोरीचा संशय घेत संशयित सुपड्या, पंकज व किरण सपकाळे यांनी दि. २४ मार्च रोजी दुपारी ३ वाजेच्या सुमारास शिवीगाळ करत हल्ला चढविला. आरोपींनी लाकडी दांडक्याने व लोखंडी आसारीने अबरारच्या उजव्या पायाच्या मांडीवर व कंबरेवर मारहाण केली, ज्यामुळे तो गंभीर जखमी झाला.

घटनेनंतर जखमीच्या वडिलांनी दिलेल्या फिर्यादीवरून रामानंद नगर पोलीस ठाण्यात संबंधित तिघांविरुद्ध गुन्हा नोंदवण्यात आला आहे. या प्रकरणाचा पुढील तपास पोलीस हेड कॉन्स्टेबल भिका खाटीक करीत आहेत.