जळगावातील व्यापाऱ्याला ३६ लाखांना गंडा; दोघांना अटक

जळगावातील व्यापाऱ्याला ३६ लाखांना गंडा; दोघांना अटक

जळगाव (प्रतिनिधी) – जळगाव शहरातील डाळ व्यापारी विनोदकुमार चंचलचंद जैन यांची दलाल आणि तीन व्यापाऱ्यांनी तब्बल ३६ लाख रुपयांची फसवणूक केल्याची घटना समोर आली आहे. जैन यांनी पैशांची मागणी केली असता त्यांना धमकावण्यात आले. या प्रकरणी एमआयडीसी पोलीस ठाण्यात गुन्हा दाखल झाल्यानंतर आर्थिक गुन्हे शाखेने दोघा आरोपींना अटक केली असून, त्यांना पाच दिवसांची पोलीस कोठडी सुनावण्यात आली आहे.

शहरातील एमआयडीसी परिसरात राहणारे विनोदकुमार जैन यांचा गेल्या २० वर्षांपासून डाळ प्रोसेसिंगचा व्यवसाय आहे. याच परिसरातील बालाजी ट्रेडिंगचा दलाल सूर्यकांत उर्फ राज संजय व्यास याने त्यांचा विश्वास संपादन केला. व्यासने जैन यांना सांगितले की, किशोर ट्रेडर्स, आयुष ट्रेडर्स आणि विष्णुकांत पुरोहित ट्रेडर्स यांना मोठ्या प्रमाणात डाळ हवी आहे.

त्यानुसार, २८ जानेवारी २०२४ रोजी जैन यांनी आयुष ट्रेडर्सला ४ लाख ३८ हजार रुपयांची मूग डाळ पाठवली. त्यानंतर १ फेब्रुवारी रोजी पुन्हा ६ लाख ८० हजार रुपयांचा माल पाठवला. संशयितांनी १०-१२ दिवसांत पैसे देण्याचे आश्वासन दिले होते. दीपक व्यास याने ६ लाख ६३ हजार रुपयांचा धनादेश (चेक) दिला, मात्र खात्यात पुरेसे पैसे नसल्याने तो बाउंस झाला. यानंतरही, संशयितांनी पुन्हा ४ लाख ४७ हजार रुपयांची डाळ मागवली. अशाप्रकारे, विनोदकुमार जैन यांची एकूण ३६ लाख ३९ हजार ६५० रुपयांची फसवणूक झाली.

या प्रकरणी चार जणांविरुद्ध गुन्हा दाखल करण्यात आला होता. पोलीस अधीक्षक डॉ. महेश्वर रेड्डी यांच्या आदेशानुसार, हा गुन्हा आर्थिक गुन्हे शाखेकडे वर्ग करण्यात आला. त्यानंतर पोलीस निरीक्षक संदीप पाटील यांच्या मार्गदर्शनाखाली किशोर मिठालाल पुरोहित आणि दीपक राजेश व्यास (दोघे रा. शिवाजी नगर) यांना अटक करण्यात आली. त्यांना न्यायालयाने पाच दिवसांची पोलीस कोठडी सुनावली असून, पुढील तपास सहाय्यक पोलीस निरीक्षक गणेश फड करत आहेत.