जळगावात टीओडी मीटर मोफत ; ग्राहकांच्या वीजबिलांच्या तक्रारी होणार कमी

जळगावात टीओडी मीटर मोफत ; ग्राहकांच्या वीजबिलांच्या तक्रारी होणार कमी

जळगाव: ग्राहकांना अचूक आणि वेळेत वीजबिल देण्यासाठी उपयुक्त असलेले अत्याधुनिक टीओडी (Time of Day) वीजमीटर आता राज्यातील इतर जिल्ह्यांप्रमाणे जळगाव जिल्ह्यातही बसवण्यात येत आहेत. हे मीटर नवतंत्रज्ञानावर आधारित आणि तांत्रिकदृष्ट्या अधिक स्मार्ट स्वरूपाचे असले तरी, ते प्री-पेड नसून, पोस्टपेड आहेत. याचा अर्थ ग्राहकांना पूर्वीप्रमाणेच वीजवापरानंतरच बिले मिळतील.

महावितरणने स्पष्ट केले आहे की, हे मीटर मोफत बसवण्यात येत असून, ग्राहकांना कुठलाही आर्थिक भुर्दंड बसणार नाही. या प्रणालीमध्ये मानवी हस्तक्षेपाला अजिबात वाव नाही, ज्यामुळे प्रगतशील तंत्रज्ञानाचा वापर वीजक्षेत्रात होत आहे, जी काळाची गरज आहे.

टीओडी मीटरचे फायदे:

• अचूक आणि वेळेवर बिलिंग: ऑटोमॅटिक मीटर रीडिंगमुळे ग्राहकांना अचूक आणि वेळेवर बिले मिळतील. यामुळे वीजबिलांसंदर्भातील ग्राहक तक्रारींमध्येही घट होईल.
• वीज दरात सवलत: महावितरणच्या नव्या वीजदर प्रस्तावानुसार, ग्राहकाने वीज कधी वापरली या वेळेनुसार दरात सवलत मिळणार आहे. टीओडी मीटर असल्याशिवाय ही सवलत मिळू शकणार नाही, त्यामुळे ग्राहकांच्या दृष्टीने टीओडी मीटर आवश्यकच आहे.

सद्यस्थितीत कृषी वर्गवारी वगळता इतर सर्व वर्गवारीतील ग्राहकांना टीओडी मीटर बसविण्यात येत आहेत. जळगाव परिमंडळात एनसीसी या एजन्सीला मीटर बसवण्याचे काम देण्यात आले आहे. सुरुवातीच्या काळात सरकारी कार्यालये, सरकारी निवासस्थाने, मोबाईल टॉवर आणि नादुरुस्त मीटरच्या ठिकाणी हे टीओडी मीटर बसवण्यात आले आहेत. नवीन वीजजोडणी देतानाही टीओडी मीटर बसविण्यात येत असून, सोलार नेट मीटरिंगसाठीही त्याचा वापर करण्यात आला आहे. आतापर्यंत जळगाव जिल्ह्यात ८५ हजार टीओडी मीटर बसविण्यात आले आहेत.

नवीन मीटर अत्याधुनिक असले तरी, ते प्री-पेड नाहीत आणि ते बसवण्यासाठी किंवा मीटरच्या किमतीसाठी ग्राहकांकडून कोणतेही शुल्क आकारले जात नाही. हे मीटर ग्राहकाने वापरलेल्या विजेची अचूक नोंद घेऊन योग्य वीजबिल देण्यास उपयुक्त ठरणार आहेत.

त्यामुळे, वीज ग्राहकांनी टीओडी मीटर बसविण्याच्या कामात महावितरण आणि संबंधित एजन्सीला सहकार्य करावे, असे आवाहन करण्यात आले आहे.