जळगावात फर्निचर दुकान फोडून चोरी

जळगावात फर्निचर दुकान फोडून चोरी

२२ हजारांची रोकड, पाच कुलर व स्टीलची शिडी लंपास; जिल्हापेठ पोलिसांत गुन्हा दाखल

जळगाव (प्रतिनिधी) : शहरातील स्टेडियम परिसरात पोलीस लाईनसमोर तसेच आमदारांच्या कार्यालयालगत असलेल्या फर्निचरच्या दुकानावर चोरट्यांनी मंगळवारी (दि. १२) मध्यरात्री घरफोडी करून रोकड व साहित्य लंपास केल्याची घटना उघडकीस आली आहे. या चोरीत सुमारे २२ हजारांची रोकड, पाच कुलर आणि स्टीलची शिडी असा ऐवज चोरट्यांनी चोरून नेल्याचे समोर आले असून याप्रकरणी जिल्हापेठ पोलीस ठाण्यात घरफोडीचा गुन्हा दाखल करण्यात आला आहे.

निळकंठ आनंदा नारखेडे (रा. नंदनवन कॉलनी, ख्वाजामिया दर्गाच्या मागे) यांचे बेंडाळे महाविद्यालयालगतच्या शॉपिंग सेंटरमध्ये ‘हर्षल एजन्सी’ नावाचे फर्निचरचे दुकान आहे. मंगळवारी रात्री नेहमीप्रमाणे सुमारे ८ वाजता त्यांनी दुकान बंद करून कर्मचारीसह घरी प्रस्थान केले.

बुधवारी सकाळी सुमारे सव्वा नऊ वाजता दुकानातील कामगार संदीप पाटील (रा. ममुराबाद) हा घरून चावी घेऊन दुकान उघडण्यासाठी आला असता शटरचे कुलूप तुटलेले दिसले. याची माहिती त्याने तात्काळ नारखेडे यांना दिली. त्यांनी घटनास्थळी येऊन पाहणी केली असता काऊंटरमधील २२ हजारांची रोकड, ‘मॅगो’ कंपनीचे पाच कुलर तसेच अॅल्युमिनियमची शिडी असा ऐवज चोरीला गेल्याचे आढळून आले.

या प्रकरणी निळकंठ नारखेडे यांच्या तक्रारीवरून जिल्हापेठ पोलीस ठाण्यात अज्ञात चोरट्यांविरुद्ध घरफोडीचा गुन्हा दाखल करण्यात आला आहे. पुढील तपास पोलीस नाईक कमलेश पवार करीत आहेत.