जळगावात मनसेची निर्णायक बैठक; ५००० हॉकर्सच्या हक्कांसाठी लढा उभारण्याचा निर्धार

जळगावात मनसेची निर्णायक बैठक; ५००० हॉकर्सच्या हक्कांसाठी लढा उभारण्याचा निर्धार
जळगाव (प्रतिनिधी) : शहरातील फेरीवाला (हॉकर्स) बांधवांच्या विविध समस्या आणि त्यांच्या उपजीविकेच्या प्रश्नांवर तोडगा काढण्यासाठी महाराष्ट्र नवनिर्माण सेनेतर्फे नेहरू चौक परिसरातील पद्मालय विश्रामगृह येथे आयोजित महत्त्वाची बैठक उत्स्फूर्त वातावरणात पार पडली. या बैठकीत सुमारे ५००० हॉकर्सच्या हक्कांसाठी ठोस लढा उभारण्याचा निर्धार करण्यात आला.
बैठकीत महापालिकेच्या अतिक्रमण विभागाकडून होत असलेल्या कारवाईबाबत तीव्र नाराजी व्यक्त करण्यात आली. हॉकर्स बांधवांवर होत असलेल्या कथित अन्यायकारक कारवाईमुळे त्यांच्या उपजीविकेवर गंभीर परिणाम होत असल्याचे मत उपस्थितांनी व्यक्त केले.
या वेळी शहरातील अधिकृत हॉकर्स झोन निश्चित करणे, फेरीवाला समितीच्या शिफारशींची अंमलबजावणी करणे, तसेच हॉकर्सना सन्मानाने व्यवसाय करण्याचा अधिकार मिळवून देणे या मुद्द्यांवर सविस्तर चर्चा झाली. याबाबत लवकरच महापालिकेसमोर ठोस कृती आराखडा सादर केला जाणार असल्याचेही स्पष्ट करण्यात आले.
हॉकर्स प्रश्नांवर प्रशासनाचे लक्ष वेधण्यासाठी आगामी काळात मोठा मोर्चा काढण्याचा निर्णयही या बैठकीत घेण्यात आला.
या बैठकीस महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे, महानगराध्यक्ष विनोद शिंदे, नगरपथविक्रेता समिती सदस्य मोहन तिवारी, विशाल पाटील, दिनेश हिंगणे, उपमहानगराध्यक्ष ललित शर्मा, चेतन पवार, आशुतोष जाधव, तसेच इतर पदाधिकारी व हॉकर्स बांधव मोठ्या संख्येने उपस्थित होते.
बैठकीतून स्पष्ट संदेश देण्यात आला की, हॉकर्सच्या हक्कांसाठी संघटना रस्त्यावर उतरून संघर्ष करेल आणि त्यांना सन्मानाने व्यवसाय करण्याचे वातावरण मिळवून देण्यासाठी प्रयत्न केले जातील.