जळगावात मनसेच्या माजी पदाधिकाऱ्यांचा भाजपात प्रवेश

जळगावात मनसेच्या माजी पदाधिकाऱ्यांचा भाजपात प्रवेश

जळगाव (प्रतिनिधी) भारतीय जनता पक्षाच्या स्थापनेच्या दिवशी जळगावच्या राजकीय वर्तुळात महत्त्वाची घडामोड घडली असून, मनसेचे माजी पदाधिकारी तसेच बांधकाम व्यावसायिक विनोद बडगुजर आणि अ‍ॅड. सागर शिंपी यांनी भाजपमध्ये अधिकृत प्रवेश केला. हा प्रवेश सोहळा ६ एप्रिल रोजी शहरातील जी.एम. फाउंडेशन येथे पार पडला.

या वेळी भाजप महानगराध्यक्ष सुरेश भोळे (राजू मामा), दीपक सूर्यवंशी यांच्यासह उदय भालेराव, सदाशिव आबा, सुनील बढे, मनोज भांडारकर आणि मनोज सोनवणे आदी पदाधिकारी उपस्थित होते. नव्या सदस्यांचे पारंपरिक गमछा देऊन स्वागत करण्यात आले.

विनोद बडगुजर आणि अ‍ॅड. सागर शिंपी यांच्या भाजप प्रवेशामुळे स्थानिक राजकारणात नवे समीकरण निर्माण होण्याची शक्यता वर्तवली जात आहे. उपस्थित नेत्यांनी या प्रवेशाचे स्वागत करत, आगामी काळात पक्ष संघटन बळकट करण्यासाठी त्यांचे योगदान महत्त्वाचे ठरेल, असा विश्वास व्यक्त केला.

दरम्यान, पक्षात सामील झालेल्या दोघांनीही आपल्या भाषणातून भाजपच्या धोरणांवर विश्वास व्यक्त करत, स्थानिक विकासासाठी आणि जनतेच्या प्रश्नांसाठी सक्रियपणे काम करण्याची ग्वाही दिली.