जळगावात रिक्षातून प्रवाशाला लुटले, १८ हजार रुपये जबरीने हिसकावले

जळगावात रिक्षातून प्रवाशाला लुटले, १८ हजार रुपये जबरीने हिसकावले

जळगाव (प्रतिनिधी) : शहरातील खोटेनगर स्टॉपजवळ तब्बल १८ हजार रुपयांची रोकड जबरीने हिसकावून नेल्याची धक्कादायक घटना घडली आहे. चाकूचा धाक दाखवत रिक्षातील प्रवाशाला लुटण्यात आले असून या प्रकरणी जळगाव तालुका पोलीस ठाण्यात तिघांविरुद्ध गुन्हा दाखल करण्यात आला आहे.

फिर्यादी जगदिश भालचंदद्र येवले (वय ३७, रा. खोटेनगर) हे आईस्क्रीम पार्लरचे व्यवसायिक असून १४ सप्टेंबर रोजी दुपारी साडेतीन वाजता दुकानावर जाण्यासाठी खोटेनगर स्टॉपवर रिक्षा पकडली. त्या रिक्षामध्ये आधीच दोन प्रवासी बसले होते. त्यापैकी एकाने पायाला दुखापत झाल्याचे सांगून येवले यांना मध्ये बसवले.

रिक्षा काही अंतरावर गेल्यानंतर दोन्ही इसमांनी येवले यांना धारदार चाकूचा धाक दाखवून त्यांच्या खिशातील १८ हजारांची रोकड हिसकावली. त्यानंतर येवले यांना रिक्षातून उतरवून आरोपी पसार झाले.

या घटनेनंतर तब्बल सहा दिवसांनी येवले यांनी पोलीस ठाण्यात धाव घेऊन तक्रार नोंदवली. त्यानुसार अज्ञात चोरट्यांविरुद्ध गुन्हा दाखल करण्यात आला असून पुढील तपास तालुका पोलीस करत आहेत.