जळगावात विवाहितेची आत्महत्या; कौटुंबिक छळाला कंटाळून जीवन संपवले

जळगावात विवाहितेची आत्महत्या; कौटुंबिक छळाला कंटाळून जीवन संपवले

जळगाव (प्रतिनिधी) – जळगाव शहरातील सुंदरमोती नगरात राहणाऱ्या २३ वर्षीय विवाहितेने कौटुंबिक छळ आणि मानसिक त्रासाला कंटाळून आत्महत्या केल्याची धक्कादायक घटना उघडकीस आली आहे. अवघ्या चार महिन्यांपूर्वी लग्न झालेल्या मयुरी गौरव ठोसर हिने १० सप्टेंबर रोजी राहत्या घरात गळफास घेऊन आपलं जीवन संपवलं. या घटनेमुळे तिच्या माहेरच्या कुटुंबावर दु:खाचा डोंगर कोसळला आहे.

लग्नानंतर सुरू झाला छळ

बुलढाणा जिल्ह्यातील पडाळी गावची रहिवासी असलेल्या मयुरीचा विवाह १० मे २०२५ रोजी जळगावच्या गौरव ठोसरसोबत झाला होता. लग्नानंतर काही दिवसांतच तिच्या सासरच्या मंडळींकडून तिचा छळ सुरू झाला. छोट्या-छोट्या गोष्टींवरून तिला शारीरिक आणि मानसिक त्रास दिला जात होता. इतकंच नाही, तर तिच्याकडून पैशांची मागणीही केली जात होती. मयुरीचा पती गौरव हादेखील तिला शिवीगाळ आणि मारहाण करत असल्याचा आरोप तिच्या नातेवाईकांनी केला आहे.

या त्रासाला कंटाळून मयुरीने आपल्या आई-वडिलांना ही गोष्ट सांगितली होती. त्यांनी पैसे देऊन वाद मिटवण्याचा प्रयत्न केला, पण काही दिवसांनी पुन्हा छळ सुरू झाला.

वाढदिवसानंतर लगेचच दुर्दैवी अंत

मयुरीचा ९ सप्टेंबर रोजी वाढदिवस होता आणि तिच्या भावाने तिला पैसे पाठवून तो साजराही झाला होता. मात्र, वाढदिवसाच्या दुसऱ्याच दिवशी, १० सप्टेंबर रोजी दुपारी ४ वाजता, घरात कुणी नसताना मयुरीने गळफास घेऊन आत्महत्या केली. हा प्रकार उघडकीस आल्यानंतर तिला तातडीने शासकीय वैद्यकीय महाविद्यालयात दाखल करण्यात आले, परंतु डॉक्टरांनी तिला मृत घोषित केले.

जोपर्यंत अटक नाही, तोपर्यंत मृतदेह स्वीकारणार नाही

या घटनेची माहिती मिळताच मयुरीचे वडील भगवान बुडूकले कुटुंबीयांसह ११ सप्टेंबर रोजी जळगावात दाखल झाले. हॉस्पिटलमध्ये पोहोचल्यावर मयुरीची आई, वडील आणि भाऊ यांनी प्रचंड आक्रोश केला. त्यांनी मयुरीच्या पतीसह, सासू, सासरे, दीर आणि नणंद यांच्यावर गुन्हा दाखल करून त्यांना अटक करण्याची मागणी केली आहे. जोपर्यंत आरोपींना अटक केली जात नाही, तोपर्यंत मृतदेह ताब्यात घेणार नाही, असा ठाम पवित्रा नातेवाईकांनी घेतला आहे. या घटनेमुळे परिसरात हळहळ व्यक्त होत आहे.