जळगावात विशेष मोतीबिंदू शस्त्रक्रिया शिबिर; २० रुग्णांना लाभ

जळगावात विशेष मोतीबिंदू शस्त्रक्रिया शिबिर; २० रुग्णांना लाभ

‘गिरीश महाजन वैद्यकीय सहायता कक्षचा पुढाकार

जळगाव : ग्रामीण भागातील गरजू रुग्णांना दर्जेदार आरोग्यसेवा उपलब्ध करून देण्यासाठी राज्याचे जलसंपदा व आपत्ती व्यवस्थापन मंत्री गिरीश महाजन यांच्या मार्गदर्शनाखाली जळगाव येथे विशेष मोतीबिंदू तपासणी व शस्त्रक्रिया शिबिर आयोजित करण्यात आले. या उपक्रमांतर्गत २० रुग्णांवर मोफत आणि यशस्वी शस्त्रक्रिया करण्यात आल्या.

जळगाव येथील शासकीय वैद्यकीय महाविद्यालय व रुग्णालयात ‘गिरीश महाजन वैद्यकीय सहायता कक्ष’च्या पुढाकाराने हे शिबिर पार पडले. विशेषतः जामनेर तालुक्यातील पहूर, पाळधी व लोंढरी परिसरातील आर्थिकदृष्ट्या दुर्बल रुग्णांनी या शिबिराचा लाभ घेतला.

ग्रामीण भागात डोळ्यांच्या आजारांकडे दुर्लक्ष होण्याची समस्या लक्षात घेऊन या मोहिमेचे नियोजन करण्यात आले होते. शिबिरात प्रथम सर्व रुग्णांची सविस्तर तपासणी करण्यात आली. त्यानंतर आवश्यक त्या रुग्णांवर तातडीने मोतीबिंदू शस्त्रक्रिया करण्यात आल्या.

शस्त्रक्रिया शासकीय रुग्णालयातील अनुभवी नेत्रतज्ज्ञांच्या पथकाने यशस्वीरित्या पूर्ण केल्या. डॉ. प्रविण पाटील, डॉ. मयुरी राठोड, डॉ. राधिका दरक, डॉ. मयुरेश डोंगरे, डॉ. सोबीया अन्सारी, डॉ. स्वाती आसोले व डॉ. प्रियंका पाटील यांचा पथकात समावेश होता. तसेच नेत्रचिकित्सा अधिकारी व आरोग्य कर्मचाऱ्यांनीही शस्त्रक्रियेदरम्यान आणि शस्त्रक्रियेनंतरच्या देखभालीत महत्त्वपूर्ण योगदान दिले.

या उपक्रमाचे समन्वयन आरोग्यदूत पै. शिवाजी पाटील यांनी केले. रुग्णांची तपासणी, रुग्णालयात ने-आण, शस्त्रक्रियेनंतरची काळजी आणि औषधोपचार याची योग्य व्यवस्था करण्यात आली होती. प्रत्येक रुग्णाच्या प्रकृतीवर वैद्यकीय पथकाने बारकाईने लक्ष ठेवले.

मोफत उपचार, तज्ज्ञ डॉक्टरांची सेवा आणि नियोजनबद्ध कार्यपद्धतीमुळे रुग्णांनी समाधान व्यक्त केले. ग्रामीण नागरिकांसाठी अशा आरोग्य उपक्रमांची आवश्यकता अधोरेखित होत असून या सामाजिक उपक्रमाचे सर्वत्र स्वागत होत आहे.