जळगावात ‘शालार्थ आयडी’ घोटाळ्याचा स्फोट; ६६१ कर्मचाऱ्यांचे आदेश संशयाच्या भोवऱ्यात

जळगावात ‘शालार्थ आयडी’ घोटाळ्याचा स्फोट; ६६१ कर्मचाऱ्यांचे आदेश संशयाच्या भोवऱ्यात

​नोंदींमध्ये खाडाखोड आणि गहाळ नस्त्यांनी खळबळ; तत्कालीन अधिकारी, संस्थाचालक व शिक्षकांवर गुन्हे

​जळगाव | प्रतिनिधी

जळगाव जिल्ह्यातील शिक्षण विभागात गाजत असलेल्या ‘शालार्थ आयडी’ घोटाळ्यात आता नवनवीन आणि धक्कादायक बाबी समोर येत आहेत. जिल्ह्यातील तब्बल ६६१ शिक्षक व शिक्षकेतर कर्मचाऱ्यांच्या शालार्थ आदेशांमध्ये गंभीर अनियमितता आढळून आली असून, बोगस आयडीधारक कर्मचाऱ्यांची संख्या आगामी काळात मोठी वाढण्याची शक्यता वर्तवण्यात येत आहे. शिक्षण विभागाच्या या कारवाईमुळे संपूर्ण जिल्हाभरात खळबळ उडाली आहे.

​शिक्षण विभागाच्या कार्यालयातील मूळ जावक रजिस्टरची सखोल पडताळणी केली असता, अनेक कर्मचाऱ्यांच्या आदेशांवरील जावक क्रमांक, दिनांक, तसेच शाळांची नावे अधिकृत नोंदींशी जुळत नसल्याचे उघड झाले आहे. बनावट आदेशांच्या आधारे ‘शालार्थ ड्राफ्ट’ मंजूर करून घेत शासनाची आर्थिक फसवणूक केल्याप्रकरणी संबंधित शिक्षक, मुख्याध्यापक, संस्था पदाधिकारी आणि तत्कालीन शिक्षण विभागातील अधिकाऱ्यांवर संघटित गुन्हे दाखल करण्यात आले आहेत.

​२९४ प्रकरणांत नोंदी आहेत, मात्र फाईल्स गायब!

​तपासणीत एक विचित्र प्रकार समोर आला आहे. तब्बल २९४ कर्मचाऱ्यांच्या शालार्थ आदेशांचे जावक क्रमांक, दिनांक आणि नाव मूळ रजिस्टरशी जुळत असले, तरी त्यांच्याशी संबंधित मूळ नस्त्या (फाईल्स) कार्यालयात उपलब्ध नाहीत. या प्रकरणांत अभिलेख्यांची पुन्हा तपासणी करण्यात येणार असून, संबंधित शाळा आणि कर्मचाऱ्यांची सखोल चौकशी केल्यानंतरच त्यांचे आदेश वैध आहेत की अवैध, यावर निर्णय घेतला जाणार आहे.

​खाडाखोड आणि नियमबाह्य पद्धतीचा वापर

​तपासणी अहवालानुसार, अनेक ठिकाणी जावक रजिस्टरमध्ये खाडाखोड करून नोंदी घुसडण्यात आल्याचे प्रथमदर्शनी दिसून आले आहे. कार्यालयीन प्रक्रियेचा अवलंब न करता, नियमबाह्य पद्धतीने हे आयडी मिळवल्याचे स्पष्ट होत आहे. काही प्रकरणांमध्ये छत्रपती संभाजीनगर येथील शिक्षण उपसंचालकांकडून कागदपत्रांची तपासणी अद्याप सुरू असून, कागदपत्रांमधील तफावत शोधण्याचे काम युद्धपातळीवर सुरू आहे.

​शासकीय तिजोरीवर दरोडा

​बनावट शालार्थ आयडीच्या माध्यमातून शासनाकडून दरमहा वेतन लाटून सरकारची आर्थिक फसवणूक करण्यात आल्याचा ठपका ठेवण्यात आला आहे. हा एक सुनियोजित कट असून यामध्ये मोठे रॅकेट सक्रिय असल्याचे बोलले जात आहे. आता या सर्व संबंधित शाळांमधील दप्तरांची (रेकॉर्ड) प्रत्यक्ष तपासणी केली जाणार असून, यात आणखी मोठी नावे समोर येण्याची शक्यता आहे.