जळगावात १३ वर्षीय बालिकेवर अत्याचार; नराधमाकडून जीवे मारण्याची धमकी
जळगाव |प्रतिनिधी जळगाव शहरात माणुसकीला काळिमा फासणारी एक अत्यंत धक्कादायक आणि संतापजनक घटना उघडकीस आली असून, अवघ्या १३ वर्षांच्या अल्पवयीन बालिकेवर वारंवार अत्याचार करण्यात आल्याचा खळबळजनक प्रकार समोर आला आहे. संशयित आरोपीने पीडितेच्या पित्याला जीवे मारण्याची धमकी देऊन तिच्या असहायतेचा फायदा घेतला. याप्रकरणी शनिपेठ पोलीस स्टेशनमध्ये संशयित आरोपीविरुद्ध पोक्सो कायद्यांतर्गत गुन्हा दाखल करण्यात आला असून, या घटनेमुळे संपूर्ण परिसरात तीव्र संताप व्यक्त केला जात आहे.
मिळालेल्या माहितीनुसार, पीडित बालिका आणि संशयित आरोपी दीपक कोळी हे एकमेकांच्या शेजारीच राहतात. याच ओळखीचा फायदा घेऊन आरोपीने बालिकेला आपल्या जाळ्यात ओढले. १९ फेब्रुवारी ते २८ फेब्रुवारी २०२६ या कालावधीत जेव्हा पीडितेच्या घरात कोणीही नव्हते, तेव्हा संधी साधून आरोपीने घरात प्रवेश केला. “जर कोणाला काही सांगितले तर तुझ्या पप्पांना मारून टाकीन,” अशी भयानक भीती दाखवून त्याने पीडितेवर जबरदस्तीने शारीरिक संबंध प्रस्थापित केले. या धमकीमुळे कमालीच्या दडपणाखाली असलेल्या बालिकेने सुरुवातीला हा प्रकार कोणालाही सांगितला नाही.
मात्र, अत्याचार करूनही आरोपी न थांबता पीडितेला वारंवार फोन करून त्रास देऊ लागला. पीडित मुलगी शाळेत जात असतानाही तो तिचा रस्ता अडवून तिला भेटण्यासाठी सक्ती करत होता. आरोपीचा हा जाच आणि दहशतीचा विळखा वाढतच गेल्याने अखेर भीतीपोटी पीडितेने धीर एकवटून घडलेला सर्व प्रकार आपल्या पालकांना सांगितला. आपल्या पोटच्या गोळ्यासोबत घडलेला हा अघोरी प्रकार ऐकून पालकांना मोठा धक्का बसला. यानंतर पीडितेच्या ४३ वर्षीय वडिलांनी तातडीने पोलीस ठाणे गाठून फिर्याद दिली.
या घटनेची गांभीर्याने दखल घेत उपविभागीय पोलीस अधिकारी नितीन गणपुरे यांनी घटनास्थळी भेट देऊन तपासाच्या सूचना दिल्या आहेत. शनिपेठ पोलिसांनी आरोपीविरुद्ध विविध कलमान्वये गुन्हा नोंदवला असून सहाय्यक पोलीस निरीक्षक साजिद मन्सूरी या प्रकरणाचा अधिक तपास करत आहेत.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
