जळगाव ग्रंथोत्सव २०२६ ला उत्साहात सुरुवात; वाचनसंस्कृती वृद्धिंगत करण्याचा  दिला संदेश

जळगाव ग्रंथोत्सव २०२६ ला उत्साहात सुरुवात; वाचनसंस्कृती वृद्धिंगत करण्याचा  दिला संदेश

जळगाव प्रतिनिधी शासनाच्या उच्च व तंत्र शिक्षण विभागांतर्गत जिल्हा ग्रंथालय अधिकारी कार्यालय, जळगाव व व. वा. वाचनालय यांच्या संयुक्त विद्यमाने ‘जिल्हा ग्रंथोत्सव २०२६’ ला आज उत्साहात सुरुवात झाली.

ग्रंथोत्सवाच्या पहिल्या दिवशी सकाळी महापौर दिपमाला काळे यांच्या उपस्थित पारंपरिक ग्रंथदिंडी काढून कार्यक्रमाची सुरुवात करण्यात आली. याप्रसंगी शिक्षणाधिकारी कल्पना चव्हाण, स्थायी समिती सभापती डॉ. चंद्रशेखर पाटील, ग्रंथपाल (व. वा. वाचनालय, जळगाव) अनिल अत्रे, सहाय्यक ग्रंथालय संचालक सचिन जोपुळे आदी उपस्थित होते.

यानंतर मान्यवरांच्या हस्ते सकाळी 11 वाजता ग्रंथोत्सवाचे उद्घाटन करण्यात आले. कार्यक्रमप्रसंगी माजी महापौर सीमा भोळे सहाय्यक ग्रंथालय संचालक सचिन जोपुळे, जिल्हा माहिती अधिकारी डॉ. रविंद्र ठाकूर, अध्यक्ष (जळगाव जिल्हा ग्रंथालय संघ) सतीश पाटील, ग्रंथपाल (व. वा. वाचनालय, जळगाव) अनिल अत्रे, तसेच व. वा. वाचनालय सचिव प्रा. डॉ. शुभदा कुलकर्णी, जिल्हा ग्रंथालय अधिकारी चंद्रशेखर ठाकूर, आदी मान्यवर उपस्थित होते. यावेळी मान्यवरांनी आपले मनोगत व्यक्त केले.

मान्यवरांनी आपल्या मनोगतातून वाचनसंस्कृतीचा प्रसार करण्याचे आवाहन करताना, आधुनिक डिजिटल युगातही पुस्तक वाचनाची गरज कायम असल्याचे अधोरेखित केले. ग्रंथालय चळवळ अधिक बळकट करण्यासाठी अशा ग्रंथोत्सवांचे महत्त्व अनन्यसाधारण असल्याचे त्यांनी नमूद केले.

‘कालानुरूप बदलती वाचनसंस्कृती’ या विषयावर परिसंवादाचे आयोजन करण्यात आले. या परिसंवादात डिजिटल युगातील वाचनाच्या बदलत्या प्रवृत्ती आणि पुस्तक वाचनाचे महत्त्व यावर वक्त्यांनी मार्गदर्शन केले.

ग्रंथोत्सवात पुस्तक प्रदर्शन व विक्रीसह विविध साहित्यिक आणि सांस्कृतिक कार्यक्रमांची मेजवानी नागरिकांना अनुभवता येत आहे. विविध प्रकाशनांचे स्टॉलही या ठिकाणी लावण्यात आले आहे. विद्यार्थी, वाचक आणि साहित्यप्रेमींचा उत्स्फूर्त प्रतिसाद या उपक्रमाला लाभत आहे.

दरम्यान, ग्रंथोत्सवाच्या दुसऱ्या दिवशी, दि. २५ मार्च रोजी “AI आणि मराठी भाषा” या विषयावर परिसंवाद आयोजित करण्यात आला असून, आधुनिक तंत्रज्ञानाच्या पार्श्वभूमीवर मराठी भाषेतील संधी व आव्हाने यावर चर्चा होणार आहे. याशिवाय कवीसंमेलन व विविध सांस्कृतिक कार्यक्रमांचे आयोजन करण्यात आले आहे.

नागरिकांनी ग्रंथोत्सवास भेट देऊन उपक्रमाचा लाभ घ्यावा, असे आवाहन आयोजकांकडून करण्यात आले आहे.