जळगाव जिल्हा कारागृहात बंदीवानाकडून कर्मचाऱ्याला मारहाण

जळगाव जिल्हा कारागृहात बंदीवानाकडून कर्मचाऱ्याला मारहाण

जळगाव (प्रतिनिधी) : जिल्हा कारागृहात न्यायालयात हजर करण्यात न आल्याने संतप्त झालेल्या एका कैद्याने गोंधळ घालून कारागृह कर्मचाऱ्याला मारहाण केल्याची घटना शनिवारी (दि. ५ जुलै) सकाळी ११ वाजता घडली. या प्रकरणी दुपारी ३ वाजता जिल्हापेठ पोलिस ठाण्यात गुन्हा दाखल करण्यात आला आहे.

अर्शद रब्बी पटेल (वय २१, रा. सुप्रिम कॉलनी, जळगाव) हा संबंधित कैदी असून तो सध्या जिल्हा कारागृहात शिक्षा भोगत आहे. शनिवारी सकाळी त्याला व काही इतर बंद्यांना बॅरेकच्या बाहेर काढण्यात आले होते. बॅरेकमध्ये परतण्याची वेळ झाल्यानंतर कारागृह कर्मचारी अंबादास जुलाल देवरे (वय ४०, रा. कारागृह वसाहत) यांनी पटेलला बॅरेकमध्ये जाण्यास सांगितले.

यावेळी पटेलने “माझी न्यायालयात पेशी आहे, मला न्यायालयात पाठवा,” असा आग्रह धरला. सुभेदार सुभाष खांडरे यांनी त्याला समजावण्याचा प्रयत्न केला. मात्र, पोलीस पथक उपलब्ध नसल्याने त्या दिवशी त्याला न्यायालयात नेणे शक्य नसल्याचे त्यांनी स्पष्ट केले.

अर्शद पटेल याने समजावूनही ऐकले नाही. उलट त्याने संतप्त होऊन शिवीगाळ केली व अचानक कर्मचारी देवरे यांच्या अंगावर धावून जाऊन धक्काबुक्की व मारहाण केली. घटनेनंतर इतर कर्मचाऱ्यांनी तातडीने介धान घालून देवरे यांना त्याच्या तावडीतून सोडवले.

या प्रकरणी अंबादास देवरे यांनी दिलेल्या फिर्यादीवरून अर्शद पटेलविरोधात शासकीय कामात अडथळा निर्माण करणे व मारहाणीचा गुन्हा दाखल करण्यात आला आहे. याप्रकरणाचा तपास पोलीस उपनिरीक्षक उल्हास चऱ्हाटे करीत आहेत.