जळगाव जिल्हा जातपडताळणीत आघाडीवर; वर्षभरात २८ हजार विद्यार्थ्यांची प्रक्रिया पूर्ण! ​’समता सप्ताहा’निमित्त १ हजार त्रुटीधारक विद्यार्थ्यांना विशेष संधी; प्रशासनाचा मोठा निर्णय

जळगाव जिल्हा जातपडताळणीत आघाडीवर; वर्षभरात २८ हजार विद्यार्थ्यांची प्रक्रिया पूर्ण!
​’समता सप्ताहा’निमित्त १ हजार त्रुटीधारक विद्यार्थ्यांना विशेष संधी; प्रशासनाचा मोठा निर्णय
​जळगाव:
जिल्ह्यात २०२५-२६ या शैक्षणिक वर्षात जात पडताळणी प्रक्रियेला विद्यार्थ्यांचा उत्स्फूर्त प्रतिसाद मिळाला आहे. महाविद्यालयांच्या माध्यमातून प्राप्त झालेल्या २९ हजार २७२ अर्जांपैकी २८ हजार २९४ विद्यार्थ्यांची पडताळणी यशस्वीरित्या पूर्ण झाली आहे. विशेष म्हणजे, भारतरत्न डॉ. बाबासाहेब आंबेडकर सामाजिक समता सप्ताहाचे औचित्य साधून प्रशासनाने त्रुटी असलेल्या १ हजार विद्यार्थ्यांच्या अर्जांना मंजुरी मिळवण्यासाठी विशेष संधी उपलब्ध करून दिली आहे.
​त्रुटीधारक विद्यार्थ्यांना दिलासा
जिल्ह्यात सुमारे १००५ अर्जांमध्ये तांत्रिक त्रुटी आढळून आल्या होत्या. या विद्यार्थ्यांना ई-मेलद्वारे आधीच कळवण्यात आले होते. आता ‘समता सप्ताहा’च्या निमित्ताने हे विद्यार्थी जिल्हा कार्यालयात प्रत्यक्ष येऊन आवश्यक कागदपत्रांची पूर्तता करू शकणार आहेत. यामुळे अनेक विद्यार्थ्यांचे शैक्षणिक नुकसान टळणार असून पुढील प्रवेश प्रक्रिया सुकर होणार आहे.
​महिनानिहाय प्राप्त अर्जांची आकडेवारी:
​डिसेंबर आणि जानेवारी महिन्यात सर्वाधिक अर्ज प्राप्त झाले असून, वर्षभराचा गोषवारा खालीलप्रमाणे आहे:

महिना अर्ज संख्या महिना अर्ज संख्या
एप्रिल ४,२७२ ऑक्टोबर ४,१९५
मे ३,७८३ नोव्हेंबर ५,१५४
जून ४,२७३ डिसेंबर ६,४४७
ऑगस्ट ३,५०३ जानेवारी ५,४९९
सप्टेंबर ३,३५३ फेब्रुवारी ५,००२
मार्च ३,५४८ एकूण २९,२७२

समान संधी केंद्र’ ठरले मदतीचे:

जिल्ह्यातील महाविद्यालयांमध्ये सुरू करण्यात आलेल्या ‘समान संधी केंद्रां’मुळे ही प्रक्रिया अधिक वेगवान झाली. या केंद्रांनी विद्यार्थ्यांना अर्ज भरण्यापासून ते कागदपत्रे गोळा करण्यापर्यंत मोलाचे मार्गदर्शन केले आहे. ज्या विद्यार्थ्यांनी अद्याप अर्ज केलेले नाहीत, त्यांनाही नवीन अर्ज करण्याची संधी देण्यात आली आहे.
​”जिल्ह्यात २०२५ या वर्षात आलेल्या अर्जांपैकी सुमारे १००५ अर्जांमध्ये काही त्रुटी होत्या, त्यांना ई-मेलद्वारे कळवण्यात आले होते.

आता या ‘समता सप्ताहा’त संबंधित विद्यार्थ्यांना कार्यालयात येऊन कागदपत्रे सादर करून प्रक्रिया पूर्ण करता येईल. विद्यार्थ्यांनी या संधीचा लाभ घ्यावा.”
​— राकेश महाजन
(उपायुक्त, जिल्हा जातपडताळणी विभाग, जळगाव)