जळगाव जिल्हा डीपीसी निधी खर्चात राज्यात अव्वल

जळगाव जिल्हा डीपीसी निधी खर्चात राज्यात अव्वल

सलग चौथ्या वर्षी १०० टक्के निधी वापर; पालकमंत्री गुलाबराव पाटील यांच्या हस्ते अधिकाऱ्यांचा गौरव

जळगाव : जिल्हा वार्षिक योजना (डीपीसी) अंतर्गत निधीच्या प्रभावी नियोजन आणि काटेकोर अंमलबजावणीमुळे जळगाव जिल्ह्याने राज्यात सलग चौथ्यांदा अव्वल स्थान पटकावले आहे. सन २०२५-२६ या आर्थिक वर्षात सर्वसाधारण, आदिवासी (टीएसपी/ओटीएसपी) आणि अनुसूचित जाती (एससीपी) घटकांसाठी मंजूर करण्यात आलेल्या एकूण ८३४ कोटी ६१ लाख ८९ हजार रुपयांच्या निधीचा १०० टक्के वापर करण्यात प्रशासनाला यश आले आहे.

नियोजनबद्ध कामगिरीमुळे विक्रम कायम

जिल्हा नियोजन समिती जळगाव अंतर्गत विविध शासकीय विभागांनी समन्वयाने काम करत विकासकामांची प्रभावी अंमलबजावणी केली. या यशामागे पालकमंत्री गुलाबराव पाटील यांच्या मार्गदर्शनासोबतच जलसंपदा मंत्री गिरीश महाजन, केंद्रीय राज्यमंत्री रक्षा खडसे आणि वस्त्रोद्योग मंत्री संजय सावकारे यांचे सहकार्य लाभले.

अधिकाऱ्यांचा पदांसह गौरव

या उल्लेखनीय कामगिरीबद्दल पालकमंत्री गुलाबराव पाटील यांच्या हस्ते जिल्ह्यातील वरिष्ठ अधिकाऱ्यांचा सन्मान करण्यात आला. यामध्ये रोहन घुगे (जिल्हाधिकारी), मिनल करनवाल (मुख्य कार्यकारी अधिकारी, जिल्हा परिषद), महेश्वर रेड्डी (पोलीस अधीक्षक), ज्ञानेश्वर ढेरे (महानगरपालिका आयुक्त), भरत साळुंखे (जिल्हा नियोजन अधिकारी), योगेश पाटील (जिल्हा समाजकल्याण अधिकारी) तसेच अरुण पवार (प्रकल्प संचालक, यावल) यांचा समावेश होता.

घटकनिहाय निधीचा वापर

सर्वसाधारण घटकासाठी ६७७ कोटी रुपये, अनुसूचित जाती घटकासाठी ९३ कोटी रुपये आणि आदिवासी घटकासाठी ६४ कोटी ६१ लाख ८९ हजार रुपये असा एकूण निधी पूर्णपणे खर्च करण्यात आला. या निधीतून ग्रामीण व शहरी भागातील विविध विकासकामांना गती मिळाली आहे.

पुढील वर्षासाठी वाढीव तरतूद

सन २०२६-२७ या आर्थिक वर्षासाठी ९०० कोटी ०५ लाख रुपयांच्या निधीला शासनाने मान्यता दिली असून, मागील वर्षाच्या तुलनेत ६५ कोटी ४३ लाख ११ हजार रुपयांची वाढ करण्यात आली आहे.