जळगाव जिल्हा परिषदेच्या मीनल करनवाल नव्या सीईओ

जळगाव जिल्हा परिषदेच्या मीनल करनवाल नव्या सीईओ

श्री अंकित यांची छत्रपती संभाजीनगर येथे बदली

जळगाव;- : राज्य शासनाने आयएएस अधिकाऱ्यांच्या बदल्या जाहीर केल्या असून, जळगाव जिल्हा परिषदेच्या मुख्य कार्यकारी अधिकारी (सीईओ) श्री अंकित यांची बदली छत्रपती संभाजीनगर येथे करण्यात आली आहे. त्यांच्या जागी नांदेड जिल्हा परिषदेच्या सीईओ श्रीमती मीनल करनवाल यांची नियुक्ती करण्यात आली आहे.

श्रीमती मीनल करनवाल लवकरच सीईओ पदाचा कार्यभार स्वीकारणार असून, शिक्षण, आरोग्य, पाणीपुरवठा आणि ग्रामीण विकास यासारख्या क्षेत्रात नवे उपक्रम राबवण्यावर त्यांचा भर असेल. जळगावच्या प्रगतीला नवा वेग मिळेल, अशी अपेक्षा व्यक्त केली जात आहे.

सीईओ पदावर असताना श्री अंकित यांनी जिल्ह्यातील विविध योजना प्रभावीपणे राबवल्या. त्यांच्या कार्यकाळात अनेक महत्त्वपूर्ण निर्णय आणि सुधारणा अमलात आणण्यात आल्या. छत्रपती संभाजीनगर येथे बदली झाल्याने ते नव्या जबाबदाऱ्या स्वीकारणार आहेत.

प्रशासकीय बदलांमुळे जिल्हा परिषदेच्या कामकाजाला गती
राज्य शासनाच्या आदेशानुसार, विविध जिल्ह्यांमध्ये प्रशासकीय फेरबदल करण्यात आले असून, नव्या अधिकाऱ्यांच्या नियुक्त्या करण्यात आल्या आहेत.

मीनल करनवाल यांच्या नेतृत्वाखाली जळगाव जिल्ह्यातील विकास अधिक प्रभावीपणे होईल, अशी नागरिकांची अपेक्षा आहे. जिल्ह्यातील ग्रामविकास, महिला सशक्तीकरण आणि आरोग्य क्षेत्रात सुधारणा करण्यासाठी त्या नवे उपक्रम हाती घेतील, असा विश्वास व्यक्त केला जात आहे.