जळगाव तापले! पारा ४०.३ अंशांवर; राज्यात दुसऱ्या क्रमांकाचे उष्ण शहर
चार दिवसांत तापमानात ३ अंशांची वाढ; उष्णतेच्या झळा तीव्र
जळगाव : गेल्या काही दिवसांपासून जळगाव शहरात उन्हाच्या तीव्र झळा जाणवू लागल्या असून तापमानात सातत्याने वाढ होत आहे. मंगळवारी (दि.१०) शहराचा पारा ४०.३ अंश सेल्सिअसपर्यंत पोहोचला. विशेष म्हणजे, यंदाच्या हंगामातील हे आतापर्यंतचे सर्वाधिक तापमान ठरले आहे.
चार दिवसांत मोठी वाढ
ममुराबाद येथील हवामान वेधशाळेत ही तापमान नोंद करण्यात आली आहे. गेल्या चार दिवसांत शहराच्या तापमानात तब्बल ३ अंशांची वाढ झाली असून नागरिकांना उष्णतेचा चटका अधिक जाणवू लागला आहे. सकाळपासूनच उन्हाची तीव्रता वाढत असून दुपारच्या वेळी रस्तेही तुलनेने ओस पडलेले दिसत आहेत.
राज्यात दुसऱ्या क्रमांकाचे उष्ण शहर
१० मार्च रोजी राज्यातील सर्वाधिक तापमान अकोला येथे ४०.७ अंश नोंदवले गेले. त्यानंतर जळगाव हे राज्यातील दुसऱ्या क्रमांकाचे उष्ण शहर ठरले आहे. दरम्यान, हवामान विभागाने यापूर्वीच जळगाव जिल्ह्यासाठी ‘यलो अलर्ट’ जारी केला होता.
तापमान ४० अंशांच्या आसपासच
हवामान खात्याच्या अंदाजानुसार, ११ मार्चलाही तापमानाचा पारा ४० अंशांच्या आसपास राहण्याची शक्यता आहे. त्यामुळे नागरिकांनी उष्णतेपासून बचाव करण्यासाठी दुपारच्या वेळी बाहेर जाणे टाळावे, तसेच पाणी व द्रवपदार्थांचे सेवन वाढवावे, असा सल्ला तज्ज्ञांनी दिला आहे.
गेल्या पाच दिवसांतील तापमान
१० मार्च : ४०.३ अंश
९ मार्च : ३९.६ अंश
८ मार्च : ३८.५ अंश
७ मार्च : ३८.२ अंश
६ मार्च : ३७.४ अंश
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
