जळगाव तालुक्यात रायपूर कुसुंबा येथे दहावीतील विद्यार्थ्याची आत्महत्या; परिसरात हळहळ

जळगाव तालुक्यात रायपूर कुसुंबा येथे दहावीतील विद्यार्थ्याची आत्महत्या; परिसरात हळहळ

जळगाव, दि. १ ऑगस्ट – जळगाव तालुक्यातील रायपूर कुसुंबा येथील एक धक्कादायक घटना समोर आली असून, वैभव रवींद्र ठाकूर (वय १६) या दहावीच्या विद्यार्थ्याने राहत्या घरात गळफास घेऊन आत्महत्या केल्याने संपूर्ण गावात शोककळा पसरली आहे. ही घटना शुक्रवार, १ ऑगस्ट रोजी सायंकाळी ७ वाजेच्या सुमारास घडली.

वैभव कुसुंबा येथील श्री स्वामी समर्थ विद्यालयात दहावीत शिक्षण घेत होता. घरातील आर्थिक परिस्थिती अत्यंत सामान्य असून, वडील खाजगी चालक म्हणून कुटुंबाचा उदरनिर्वाह करत होते. वैभवच्या पश्चात आई-वडील आणि एक लहान भाऊ असा परिवार आहे.

शुक्रवारी संध्याकाळच्या सुमारास वैभव घरी एकटाच होता. त्या वेळी त्याने दोरीने गळफास घेत आत्महत्या केली. थोड्याच वेळात त्याची आई आणि भाऊ घरी परतल्यानंतर त्यांनी ही धक्कादायक घटना पाहून जोरदार आक्रोश केला. शेजाऱ्यांनी तत्काळ त्याला शासकीय वैद्यकीय महाविद्यालय व रुग्णालयात दाखल केले, परंतु वैद्यकीय अधिकाऱ्यांनी वैभवला मृत घोषित केले.

वैभवच्या आत्महत्येचे नेमके कारण अद्याप समजू शकलेले नाही. मात्र या प्रकाराने संपूर्ण गावात हळहळ व्यक्त होत आहे. कुटुंबियांचा शोकाकुल आक्रोश रुग्णालय परिसरात भावुक वातावरण निर्माण करणारा होता.

या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली असून, पुढील तपास पोलीस कर्मचारी करीत आहेत.

या घटनेने किशोरवयीन विद्यार्थ्यांवरील मानसिक ताणाचा प्रश्न पुन्हा ऐरणीवर आला असून, पालक आणि शैक्षणिक संस्थांनी मुलांच्या भावनिक आरोग्याकडे अधिक संवेदनशीलतेने लक्ष देण्याची गरज अधोरेखित झाली आहे.