जळगाव पोलीस भरती: १७१ जागांसाठी लेखी परीक्षा संपन्न; ५६ उमेदवारांची दांडी

जळगाव पोलीस भरती: १७१ जागांसाठी लेखी परीक्षा संपन्न; ५६ उमेदवारांची दांडी

​२ हजार ९६ पैकी २ हजार ४० उमेदवारांची उपस्थिती; निकाल लवकरच संकेतस्थळावर

​जळगाव | प्रतिनिधी

जळगाव जिल्हा पोलीस दलातील पोलीस शिपाई पदाच्या १७१ जागांसाठी भरती प्रक्रियेचा अंतिम टप्पा असलेल्या लेखी परीक्षेचा सोहळा रविवारी, १५ मार्च रोजी शांततेत पार पडला. या परीक्षेसाठी पात्र ठरलेल्या एकूण २ हजार ९६ उमेदवारांपैकी २ हजार ४० उमेदवारांनी आपली उपस्थिती नोंदवली. विशेष म्हणजे, अत्यंत खडतर मैदानी चाचणी पार करून गुणवत्ता यादीत स्थान मिळवल्यानंतरही ५६ उमेदवारांनी लेखी परीक्षेला दांडी मारल्याचे समोर आले आहे.

​पोलीस शिपाई पदासाठी झालेल्या मैदानी चाचणीनंतर पात्र उमेदवारांची लेखी परीक्षा शहरातील मू.जे. महाविद्यालय परीक्षा केंद्रावर सकाळी ११ वाजेपासून घेण्यात आली. पोलीस अधीक्षक डॉ. महेश्वर रेड्डी यांच्या प्रत्यक्ष मार्गदर्शनाखाली ही संपूर्ण प्रक्रिया पारदर्शकपणे राबविण्यात आली.

​उमेदवारांसह पालकांचीही जणू ‘परीक्षा’

​परीक्षेची वेळ सकाळी ११ ते दुपारी १२:३० असली, तरी कागदपत्रांच्या पडताळणीसाठी उमेदवारांना सकाळी ८ वाजेपासूनच हजर राहण्याच्या सूचना देण्यात आल्या होत्या. त्यामुळे शहराबाहेरून आलेले उमेदवार आणि त्यांचे पालक पहाटेपासूनच परीक्षा केंद्र परिसरात दाखल झाले होते. कडक उन्हातही पालक दुपारपर्यंत केंद्राबाहेर आपल्या पाल्यांची वाट पाहत थांबून होते. यामुळे मू.जे. महाविद्यालय परिसरात मोठी गर्दी आणि जत्रेसारखे स्वरूप प्राप्त झाले होते.

​निकालाबाबत पोलीस दलाचे आवाहन

​लेखी परीक्षेचा निकाल आणि त्यानंतरची अंतिम निवड यादी लवकरच जळगाव जिल्हा पोलीस दलाच्या अधिकृत संकेतस्थळावर (Website) प्रसिद्ध केली जाणार आहे. पोलीस भरती प्रक्रियेबाबत कोणत्याही अफवांना किंवा चुकीच्या माहितीला उमेदवारांनी बळी पडू नये, तसेच अधिकृत माहितीसाठी केवळ संकेतस्थळाचाच वापर करावा, असे आवाहन पोलीस प्रशासनाकडून करण्यात आले आहे.