जळगाव महापालिकेचा ‘स्वच्छता स्ट्राईक’; दोन दिवसांत शहरातील सर्व मार्केट चकाचक होणार!

जळगाव महापालिकेचा ‘स्वच्छता स्ट्राईक’; दोन दिवसांत शहरातील सर्व मार्केट चकाचक होणार!

​महापौर दीपमाला काळे यांचे आदेश; कामचुकार कर्मचाऱ्यांवर होणार शिस्तभंगाची कारवाई

​जळगाव (प्रतिनिधी) : जळगाव शहराच्या स्वच्छतेचा प्रश्न कायमस्वरूपी मार्गी लावण्यासाठी आणि बाजारपेठांचा चेहरामोहरा बदलण्यासाठी महानगरपालिका प्रशासनाने आता कंबर कसली आहे. महापौर दीपमाला काळे यांच्या कडक निर्देशानुसार, येत्या शुक्रवार (६ मार्च) आणि शनिवार (७ मार्च) रोजी शहरातील सर्व मनपा मार्केट आणि त्यांच्या परिसराची १००% साफसफाई करण्यासाठी विशेष ‘स्वच्छता अभियान’ राबविण्याचे आदेश देण्यात आले आहेत.

​तक्रारींची दखल आणि कडक अंमलबजावणी
महापौर दीपमाला काळे यांनी १८ फेब्रुवारी रोजी प्राप्त झालेल्या तक्रारींची गंभीर दखल घेत प्रशासनाला कडक सूचना दिल्या होत्या. त्यानुसार, सहाय्यक आयुक्त (आरोग्य) उदय मधुकर पाटील यांनी या मोहिमेचे अधिकृत आदेश निर्गमित केले आहेत. विशेष म्हणजे, या मोहिमेत महानगरपालिकेचे कायमस्वरूपी कामगार आणि ‘बी.व्ही.जी. इंडिया लि. पुणे’ या मक्तेदाराचे कामगार संयुक्तपणे उतरणार आहेत. दररोज सकाळी ७ वाजेपासून या प्रत्यक्ष कामाला सुरुवात होणार आहे.

​असे आहे दोन दिवसांचे ‘स्वच्छता वेळापत्रक’
शहरातील बाजारपेठांची व्याप्ती पाहता ही मोहीम दोन दिवसांत विभागली गेली आहे:
​६ मार्च (शुक्रवार): महात्मा फुले मार्केट, सेंट्रल फुले मार्केट, शास्त्री टॉवर, रामलाल चौबे मार्केट, जुने व नवीन बी.जे. मार्केट, धर्मशाळा मार्केट, भास्कर मार्केट, महात्मा गांधी मार्केट, भोईटे मार्केट, शिवाजी नगर दवाखाना परिसर, रेल्वे स्टेशन चौक मार्केट, शामाप्रसाद मुखर्जी मार्केट, लाठी शाळा परिसर, नानीबाई अग्रवाल आणि गेंदालाल व सोमाणी मार्केट.

​७ मार्च (शनिवार): सावखेडा मार्केट (पिंप्राळा हुडको), बाबासाहेब आंबेडकर मार्केट, छत्रपती शाहू महाराज मार्केट (जुने व नवीन), शाहू महाराज दवाखाना परिसर आणि वालेचा मार्केट.
​जीपीएस फोटोसह द्यावा लागणार अहवाल
या मोहिमेवर काटेकोर नियंत्रण ठेवण्यासाठी रमेश वामन कांबळे आणि कुणाल राजेश बारसे यांची समन्वयक म्हणून नियुक्ती करण्यात आली आहे. केवळ कागदावर स्वच्छता न दाखवता, प्रत्यक्ष कामाचे जीपीएस (GPS) फोटोसह अहवाल आणि १००% साफसफाई झाल्याचे प्रमाणपत्र मुख्य स्वच्छता निरीक्षकांमार्फत सादर करणे बंधनकारक करण्यात आले आहे.

​हलगर्जीपणा केल्यास कारवाईचा बडगा
आरोग्य निरीक्षक आणि युनिट प्रमुखांना प्रत्यक्ष जागेवर हजर राहून कामगारांची हजेरी घेण्याचे आदेश दिले आहेत. या कामात कोणत्याही प्रकारचा कामचुकारपणा किंवा हलगर्जीपणा आढळल्यास संबंधित कर्मचाऱ्यांवर तात्काळ शिस्तभंगाची कारवाई करण्याचा इशारा प्रशासनाने दिला आहे. महापालिकेच्या या आक्रमक पवित्र्यामुळे शहरातील बाजारपेठा आता मोकळा श्वास घेणार असून नागरिकांमधून समाधान व्यक्त होत आहे.