जळगाव हादरले; एकाच दिवशी तीन खून

जळगाव हादरले; एकाच दिवशी तीन खून

चोपडा, भुसावळ व हिंगोणा येथे थरारक घटना 

जळगाव : जिल्ह्यात शनिवारी एकाच दिवशी घडलेल्या तीन खूनांच्या घटनांनी परिसरात खळबळ उडाली. चोपडा, भुसावळ आणि हिंगोणा (ता. यावल) येथे घडलेल्या या घटनांप्रकरणी एकूण सात जणांना अटक करण्यात आली असून, एका प्रकरणात मुंबईतील पोलिस कर्मचाऱ्यावरही गुन्हा दाखल आहे.
प्रियकराने प्रेयसीसह स्वतःलाही संपविले
चोपडा तालुक्यातील एका गावात प्रेमसंबंधातून वाद झाल्याने देवानंद सुभाष धनगर (३५) याने विवाहित प्रेयसीच्या डोक्यात गोळी झाडून तिचा खून केला आणि त्यानंतर स्वतःवर गोळी झाडून आत्महत्या केली. शनिवारी सकाळी साडेदहाच्या सुमारास ही घटना उघडकीस आली. मृत महिलेच्या पश्चात पती व दोन मुले आहेत.

भुसावळात सिमेंटची कुंडी डोक्यात मारून खून
भुसावळातील आनंदनगर परिसरात किरकोळ वादातून अनिल ऊर्फ पिंटू आत्माराम सावकारे (४७) यांचा सिमेंटची कुंडी डोक्यात मारून खून करण्यात आला. या प्रकरणी रोहित पुरुषोत्तम भावसार याने पोलिसात हजर होत गुन्ह्याची कबुली दिली.

हिंगोण्यात तरुणाची चाकूने भोसकून हत्या
हिंगोणा (ता. यावल) येथे जुन्या भांडणाच्या पार्श्वभूमीवर लाठ्या-काठ्या व चाकूने हल्ला करून प्रथमेश मुकेश महाले (१९) या तरुणाची हत्या करण्यात आली. या प्रकरणात एका अल्पवयीनासह सात जणांविरुद्ध गुन्हा दाखल असून सहा जणांना अटक करण्यात आली आहे. संशयितांमध्ये मुंबईतील एका पोलिस कर्मचाऱ्याचाही समावेश असल्याची माहिती समोर आली आहे.