जळगाव हादरले! १४ वर्षीय अल्पवयीन मुलीने दिला बाळाला जन्म

जळगाव हादरले! १४ वर्षीय अल्पवयीन मुलीने दिला बाळाला जन्म

​पतीसह सासू-सासऱ्यांविरुद्ध ‘पोक्सो’ अंतर्गत गुन्हा; जळगाव तालुका पोलिसांची कारवाई

​जळगाव:तालुक्यातील एका गावात बालविवाहाची भीषण वास्तविकता समोर आली आहे. अवघ्या १४ वर्षे ५ दिवस वय असलेल्या एका अल्पवयीन मुलीने शासकीय वैद्यकीय महाविद्यालय व रुग्णालयात (सिव्हिल हॉस्पिटल) एका कन्येला जन्म दिला आहे. या धक्कादायक प्रकारामुळे संपूर्ण जिल्ह्यात खळबळ उडाली असून, जळगाव तालुका पोलिसांनी पीडितेच्या पतीसह सासू आणि सासऱ्यांविरुद्ध गुन्हा दाखल केला आहे.

​लग्नाच्या वर्षभरातच मातृत्वाची ओढ

​मिळालेल्या माहितीनुसार, पीडित मुलीचा विवाह समाजाच्या रीतिरिवाजाप्रमाणे सुमारे एक वर्षापूर्वी जळगाव तालुक्यातील एका तरुणासोबत लावून देण्यात आला होता. लग्नानंतर ती पती आणि सासू-सासऱ्यांसोबत राहत असताना गरोदर राहिली. ३ एप्रिल रोजी प्रसूती कळा सुरू झाल्याने तिला रात्री ८ वाजेच्या सुमारास जळगाव सिव्हिल हॉस्पिटलमध्ये दाखल करण्यात आले. तेथे तिने एका गोंडस मुलीला जन्म दिला.

​वयाचा पुरावा समोर येताच प्रशासन सतर्क

​रुग्णालयातील उपचारानंतर जेव्हा पीडितेचा जबाब नोंदवण्यात आला, तेव्हा तिची जन्मतारीख ३ एप्रिल २०१२ असल्याचे समोर आले. म्हणजेच ज्या दिवशी तिची प्रसूती झाली, त्या दिवशी तिचे वय अवघे १४ वर्षे ५ दिवस होते. अल्पवयीन मुलीचा विवाह करणे आणि तिच्याशी शारीरिक संबंध प्रस्थापित करणे हा कायद्याने गंभीर गुन्हा असल्याने पोलिसांनी तातडीने कारवाईची चक्रे फिरवली.

​बालविवाह प्रतिबंधक कायद्यासह पोक्सो अंतर्गत गुन्हा

​सहाय्यक पोलीस निरीक्षक माधुरी बोरसे आणि पोलीस उपनिरीक्षक श्यामकुमार मोरे यांनी पीडितेचा जबाब घेतला. या प्रकरणाचे गांभीर्य ओळखून पोलिसांनी भारतीय न्याय संहिता २०२३ चे कलम ६४ (२), ६५ (१) सह पोक्सो (POCSO) आणि बालविवाह प्रतिबंधक अधिनियमांतर्गत पीडितेचा पती, सासू आणि सासऱ्यांविरुद्ध गुन्हा दाखल केला आहे.