जामनेरच्या बेपत्ता तरुणाची निर्घृण हत्या

जामनेरच्या बेपत्ता तरुणाची निर्घृण हत्या

मैत्रीतील वाद ठरला जीवघेणा; शिरसोली परिसरातील घटना

मृतदेह धरणात फेकला

जळगाव (प्रतिनिधी) – जामनेर येथून चार दिवसांपूर्वी बेपत्ता झालेल्या तरुणाचा खून झाल्याचे पोलिस तपासात स्पष्ट झाले असून, कामाच्या ठिकाणी झालेल्या जुन्या वादातून ही घटना घडल्याचे उघडकीस आले आहे. जळगाव तालुक्यातील शिरसोली परिसरात मित्रांनीच गळा आवळून हत्या करून मृतदेह पोत्यात बांधून नेव्हरे धरणात टाकल्याची धक्कादायक कबुली संशयितांनी दिली आहे. या घटनेमुळे संपूर्ण जिल्ह्यात खळबळ उडाली आहे.

जामनेर शहरातील दत्त चैतन्य नगर परिसरात राहणारा निलेश राजेंद्र कासार (वय ३०) हा तरुण सोमवारी (दि. १५) रात्रीपासून बेपत्ता असल्याची तक्रार नातेवाईकांनी पोलिसांकडे दिली होती. निलेश हा आई-वडील व बहिणीसह जामनेर येथे राहत असून, जळगाव शहरातील एलटीआय फायनान्स कंपनीत नोकरी करत होता. तपासादरम्यान त्याच कंपनीत काम करणारे दिनेश चौधरी (रा. तळई, ता. एरंडोल) व भूषण बाळू पाटील (रा. पिंपरी, ता. चोपडा) हे दोघेही सध्या शिरसोली येथे वास्तव्याला असल्याची माहिती समोर आली.

कामाच्या ठिकाणी तिघांमध्ये मैत्री असली तरी काही महिन्यांपूर्वी किरकोळ कारणावरून निलेश व भूषण यांच्यात तीव्र वाद झाला होता. त्या वादाची सल भूषणने मनात ठेवली होती. दरम्यान, फायनान्सच्या एका प्रकरणाच्या चर्चेच्या निमित्ताने भूषण व दिनेश यांनी निलेशला शिरसोली येथे बोलावले. चर्चा अयशस्वी ठरल्यानंतर शिरसोली गावालगतच्या शेतात दोघांनी मिळून निलेशचा दोरीने गळा आवळत खून केल्याचे तपासात निष्पन्न झाले.

हत्यानंतर मृतदेह पोत्यात बांधून नेव्हरे धरणात फेकण्यात आला. निलेशचा शोध सुरू असताना रामदेववाडी गावाजवळ त्याची दुचाकी आढळून आल्याने पोलिसांचा संशय बळावला. एमआयडीसी पोलीस ठाण्याचे निरीक्षक बबन आव्हाड यांच्या मार्गदर्शनाखाली मोबाईल कॉल डिटेल्स व तांत्रिक विश्लेषण करण्यात आले. चौकशीत संशयित दिनेश चौधरी व भूषण पाटील यांना ताब्यात घेतल्यानंतर त्यांनी गुन्ह्याची कबुली दिली.

शुक्रवारी सकाळी नेव्हरे धरणातून निलेश कासार याचा मृतदेह बाहेर काढून शवविच्छेदनासाठी शासकीय वैद्यकीय महाविद्यालय व रुग्णालयात पाठविण्यात आला. घटनास्थळी पंचनामा करण्यात आला असून, उपविभागीय पोलीस अधिकारी नितीन गणापुरे, पोलीस निरीक्षक बबन आव्हाड यांच्यासह अधिकारी व कर्मचारी उपस्थित होते. एमआयडीसी पोलीस ठाण्यात खुनाचा गुन्हा नोंदविण्याची प्रक्रिया सुरू असून, या घटनेमुळे निलेशच्या कुटुंबावर दुःखाचा डोंगर कोसळला आहे.