जिल्हास्तरीय क्रीडा स्पर्धा उत्साहात संपन्न

जिल्हास्तरीय क्रीडा स्पर्धा उत्साहात संपन्न

जळगाव –केंद्रीय युवा कार्यक्रम व क्रीडा मंत्रालयाच्या ‘मेरा युवा भारत, जळगाव’ कार्यालयामार्फत एकलव्य क्रीडा संकुल येथे जिल्हास्तरीय क्रीडा स्पर्धांचे उत्साहात आयोजन करण्यात आले. ग्रामीण भागातील युवक-युवतींमध्ये क्रीडाविषयक आवड व जागृती निर्माण करण्याच्या उद्देशाने प्रथम तालुकास्तरावर स्पर्धा घेण्यात आल्या होत्या. त्यामधील विजेत्या खेळाडू व संघांना जिल्हास्तरावर सहभागी करून घेण्यात आले.
या स्पर्धांमध्ये कबड्डी (मुले) व खो-खो (मुली) या सांघिक स्पर्धांसह १०० मीटर धावणे व गोळाफेक या वैयक्तिक क्रीडा प्रकारांचा समावेश होता.

उद्घाटनप्रसंगी जिल्हा युवा अधिकारी श्री. अभिषेक चवरे यांनी प्रास्ताविकातून ‘युवकांच्या व्यक्तिमत्त्व विकासासाठी’ मेरा युवा भारततर्फे अशा क्रीडा स्पर्धांचे आयोजन केले जात असल्याचे सांगत सर्व स्पर्धकांचे स्वागत केले. विद्यापीठाच्या राष्ट्रीय सेवा योजना (रासेयो) विभागाचे संचालक डॉ. व्ही. एम. रोकडे यांनी युवकांनी क्रीडेला जीवनाचा अविभाज्य भाग बनवावा, असे आवाहन केले.

कबड्डी स्पर्धेत एकलव्य मंडळ, जळगाव संघाने प्रथम क्रमांक पटकावला. आई तुळजाभवानी संघ, पाचोरा यांनी द्वितीय तर वीर जवान संघ, भडगाव यांनी तृतीय क्रमांक मिळवला.
खो-खो स्पर्धेत रावेर संघ प्रथम, अमळनेर संघ द्वितीय तर जळगाव संघ तृतीय क्रमांकावर राहिला. या स्पर्धेत उत्कृष्ट संरक्षक म्हणून अनुष्का भवरे तर उत्कृष्ट आक्रमक म्हणून जान्हवी पाटील हिची निवड करण्यात आली.
वैयक्तिक स्पर्धांमध्ये १०० मीटर धावण्याच्या युवक गटात चेतन माळी (प्रथम), आदित्य पाटील (द्वितीय) व गौरव महाजन (तृतीय) यांनी यश मिळवले. युवती गटात प्रतीक्षा महाजन (प्रथम), आरती पाटील (द्वितीय) व सविता पाटील (तृतीय) यांनी पदके पटकावली.
गोळाफेक स्पर्धेत युवक गटात आकाश धनगर (प्रथम), चेतन माळी (द्वितीय) व हर्षल पाटील (तृतीय) यांनी तर युवती गटात सुजल शुक्ला (प्रथम), रोशनी सोनार (द्वितीय) व सविता पाटील (तृतीय) यांनी उल्लेखनीय कामगिरी केली.

एकलव्य क्रीडा संकुलाचे संचालक श्रीकृष्ण बेलोरकर यांच्या हस्ते पारितोषिक वितरण करण्यात आले. यावेळी जिल्हा युवा अधिकारी श्री. अभिषेक चवरे व माय भारत, जळगावचे लेखाधिकारी श्री. सुनील पंजे उपस्थित होते.
कार्यक्रमाच्या यशस्वी आयोजनासाठी प्रा. रणजीत पाटील, युथ क्लब संचालक नितीन नेरकर, युवा स्वयंसेवक कमलेश सोनवणे व चेतन पाटील यांनी विशेष परिश्रम घेतले.