जिल्ह्यातील सहा नगरपरिषदांमध्ये आज मतदान

जिल्ह्यातील सहा नगरपरिषदांमध्ये आज मतदान

३३ हजारांहून अधिक मतदारांचा सहभाग; ४४ मतदान केंद्रांवर प्रक्रिया

जळगाव (प्रतिनिधी) : जळगाव जिल्ह्यातील विविध नगरपरिषद व नगरपंचायतींसाठी शनिवार दि. २० डिसेंबर २०२५ रोजी होणाऱ्या मतदानाच्या पार्श्वभूमीवर जिल्हा प्रशासनाने सर्व तयारी पूर्ण केली आहे. वरणगाव, पाचोरा, भुसावळ, अमळनेर, यावल आणि सावदा या नगरपरिषदांमधील एकूण नऊ प्रभागांमध्ये आज मतदानाची प्रक्रिया पार पडणार असून, त्यासाठी प्रशासनाने स्वतंत्र यंत्रणा उभारली आहे. कायदा व सुव्यवस्था अबाधित राहावी यासाठी विशेष दक्षता घेण्यात आली आहे.
या निवडणुकीसाठी जिल्हाभरात एकूण ४४ मतदान केंद्रे निश्चित करण्यात आली असून, संपूर्ण प्रक्रियेवर देखरेख ठेवण्यासाठी नऊ क्षेत्रीय अधिकाऱ्यांची नियुक्ती करण्यात आली आहे. प्रत्येक मतदान केंद्रावर आवश्यक मनुष्यबळ, साहित्य व सुरक्षा व्यवस्था उपलब्ध करून देण्यात आली आहे.
प्रभागनिहाय मतदानाचे स्वरूप
वरणगाव नगरपरिषदेत प्रभाग क्रमांक १०-अ आणि १०-क या दोन प्रभागांत मतदान होणार असून, येथे प्रत्येकी सहा मतदान केंद्रे ठेवण्यात आली आहेत. पाचोरा नगरपरिषदेत प्रभाग ११-अ आणि १२-ब, भुसावळ येथे ४-ब आणि ५-ब, अमळनेर येथे ११-ब, यावल येथे १-अ, तर सावदा नगरपरिषदेत प्रभाग ८-ब मध्ये मतदान होणार आहे.
३३,६६२ मतदारांचा सहभाग
या निवडणुकीत एकूण ३३,६६२ मतदार मतदानाचा हक्क बजावणार आहेत. त्यामध्ये १६,९५३ पुरुष मतदार, १६,७०६ महिला मतदार तसेच ३ इतर मतदारांचा समावेश आहे. महिला व पुरुष मतदारांची संख्या जवळपास समान असल्याने यंदा मतदानाची टक्केवारी वाढेल, असा प्रशासनाचा अंदाज आहे. मतदारांनी मोठ्या संख्येने बाहेर पडून मतदान करावे, असे आवाहनही प्रशासनाकडून करण्यात आले आहे.
संवेदनशील केंद्रे नाहीत, तरीही दक्षता
जिल्हा प्रशासनाच्या माहितीनुसार, यंदाच्या निवडणुकीत कोणतेही संवेदनशील किंवा अतिसंवेदनशील मतदान केंद्र नाही. मात्र, संभाव्य अनुचित प्रकार टाळण्यासाठी आणि शांततेत मतदान प्रक्रिया पार पाडण्यासाठी पोलिसांचा कडेकोट बंदोबस्त ठेवण्यात आला आहे. विशेष पथके, गस्त आणि त्वरित प्रतिसाद यंत्रणा कार्यान्वित करण्यात आल्याने निवडणूक प्रक्रिया शांततेत पार पडेल, असा विश्वास प्रशासनाने व्यक्त केला आहे.