जिल्ह्यात गारपिटीसह वादळी पावसाचा तडाखा; १३ तालुक्यांतील ९,३८१ हेक्टर पिके मातीमोल

जिल्ह्यात गारपिटीसह वादळी पावसाचा तडाखा; १३ तालुक्यांतील ९,३८१ हेक्टर पिके मातीमोल

१६,६३५ शेतकरी बाधित; मका, ज्वारी, बाजरीसह फळबागांचे मोठे नुकसान

प्रतिनिधी | जळगाव : जिल्ह्यात सोमवारी सायंकाळी झालेल्या गारपिटीसह वादळी पावसाने शेतकऱ्यांच्या हातातोंडाशी आलेला घास हिरावून घेतला असून मोठ्या प्रमाणात पिकांचे नुकसान झाले आहे. कृषी विभागाच्या प्राथमिक अंदाजानुसार १३ तालुक्यांतील ९,३८१.४० हेक्टरवरील पिकांचे नुकसान झाले असून ३७३ गावांमधील तब्बल १६,६३५ शेतकरी बाधित झाले आहेत.
जिल्हा अधीक्षक कृषी अधिकाऱ्यांनी दिलेल्या माहितीनुसार, अवकाळी पावसामुळे बाजरी, मका, कांदा, गहू, हरभरा, ज्वारी, केळी, ऊस, पपई, मोसंबी व भाजीपाला पिकांचे मोठे नुकसान झाले आहे. भुसावळ व अमळनेर हे दोन तालुके या आपत्तीपासून वाचले असले तरी उर्वरित भागात पिकांचे प्रचंड नुकसान झाले. यामध्ये सर्वाधिक फटका ३६३३ हेक्टरवरील मका, ३१३९ हेक्टरवरील ज्वारी व १०६५ हेक्टरवरील बाजरी पिकांना बसला आहे. एरंडोल तालुक्यात सर्वाधिक ५०१७ हेक्टर क्षेत्र बाधित झाले आहे.

कापणीसाठी तयार पिके आडवी; शेतकऱ्यांचे मोठे आर्थिक नुकसान
मार्चमधील अवकाळी पावसामुळे आधीच अडचणीत सापडलेल्या शेतकऱ्यांवर पुन्हा एकदा संकट कोसळले आहे. कापणीसाठी तयार असलेली गहू, हरभरा, कांदा, केळी व भाजीपाला पिके शेतातच आडवी पडल्याने मोठे नुकसान झाले आहे. काही भागांत फळबागांनाही मोठा फटका बसला आहे.

पंचनाम्यांची प्रतीक्षा; मदतीसाठी शेतकऱ्यांची मागणी
नुकसानानंतर शेतकरी प्रशासनाकडून पंचनाम्यांची प्रतीक्षा करत असून अद्याप सर्वत्र पंचनामे सुरू झालेले नाहीत. त्यामुळे नुकसानभरपाई मिळण्यास विलंब होण्याची शक्यता व्यक्त होत आहे. तत्काळ पंचनामे करून आर्थिक मदत द्यावी, अशी मागणी शेतकऱ्यांकडून होत आहे. दरम्यान, या संकटाच्या काळात लोकप्रतिनिधींनी प्रत्यक्ष शेतांमध्ये जाऊन पाहणी करावी, अशीही अपेक्षा व्यक्त केली जात आहे.

तालुकानिहाय नुकसान (हेक्टर व बाधित शेतकरी संख्या)
जळगाव- १३३ (१६१), यावल- १११.६० (७३), रावेर- १०.५० (२३), बोदवड- ५७ (१९८), मुक्ताईनगर- ४०४ (६५८), चोपडा- १८.५० (३३), एरंडोल- ५०१७ (७२८७), धरणगाव- ३६५ (६७५), पारोळा- १९७५.५० (४६८०), पाचोरा- ७७१ (१२५०), जामनेर- २९७.४० (५५२), चाळीसगाव- ४७६ (१३०२), भडगाव- १४९३ (३२७३).