जिल्ह्यात समता सप्ताहानिमित्त जात वैधता प्रमाणपत्रासाठी विशेष मोहीम

जिल्ह्यात समता सप्ताहानिमित्त जात वैधता प्रमाणपत्रासाठी विशेष मोहीम

जळगाव,  महामानव भारतरत्न डॉ. बाबासाहेब आंबेडकर यांच्या जयंतीचे औचित्य साधून जिल्हा जात प्रमाणपत्र पडताळणी समिती, जळगाव यांच्या वतीने समता सप्ताहाचे आयोजन करण्यात आले आहे. हा सप्ताह दि. ८ एप्रिल २०२६ ते १४ एप्रिल २०२६ या कालावधीत साजरा केला जाणार आहे.
या समता सप्ताहांतर्गत इयत्ता १२ वी विज्ञान शाखेतील शैक्षणिक वर्ष २०२५-२६ मधील सर्व मागासवर्गीय विद्यार्थ्यांना जात वैधता प्रमाणपत्र मिळावे यासाठी विशेष मोहिम राबविण्यात येणार आहे. या मोहिमेमध्ये अनुसूचित जाती, विजाभज, इमाव व विमाप्र (एस.ई.बी.सी) प्रवर्गातील विद्यार्थ्यांची जात पडताळणी प्रकरणे तालुका व महाविद्यालय निहाय तसेच संख्यात्मक माहितीच्या आधारे संकलित केली जाणार आहे.
तसेच सीईटी, नीट, गेट इत्यादी विद्यार्थी तसेच डिप्लोमा व डी-फार्मसी तृतीय वर्षातील विद्यार्थ्यांचे ऑनलाईन अर्ज भरून घेण्यात येणार आहेत. अर्ज भरताना येणाऱ्या अडचणी लक्षात घेता संबंधित महाविद्यालयांतील समान संधी केंद्रामार्फत वेबिनारचे आयोजन करण्यात येणार आहे.
या माध्यमातून सर्व मागासवर्गीय विद्यार्थ्यांचे अर्ज जमा करून त्यावर तात्काळ कार्यवाही करत जात वैधता प्रमाणपत्र देण्याचे नियोजन समितीने केले आहे.
दरम्यान, दि. ९ व १० एप्रिल तसेच दि. १३ एप्रिल २०२६ रोजी जिल्हा जात पडताळणी कार्यालय स्तरावर त्रुटी पूर्तता मोहिम राबविण्यात येणार आहे. त्यामुळे विज्ञान शाखेतील प्रवेशित परीक्षा देणाऱ्या विद्यार्थ्यांनी आपापल्या महाविद्यालयात परिपूर्ण अर्ज सादर करून या मोहिमेचा लाभ घ्यावा, असे आवाहन संशोधन अधिकारी तथा सदस्य सचिव श्रीमती एन. एस. रायते यांनी केले आहे.