जि.प.मध्ये अनुकंपा भरतीला वेग

जि.प.मध्ये अनुकंपा भरतीला वेग

प्रतीक्षेतल्या उमेदवारांना दिलासा; १८ जणांना लवकरच नियुक्ती

जळगाव : जिल्हा परिषदेअंतर्गत अनुकंपा तत्त्वावरील नियुक्त्यांचा प्रश्न अखेर मार्गी लागण्याच्या दिशेने पावले उचलली जात असून प्रतीक्षेत असलेल्या उमेदवारांना दिलासा मिळणार आहे. एकूण २१६ जणांची नावे प्रतीक्षा यादीत असून त्यापैकी १८ जणांनी वर्ग ‘ड’ श्रेणीत नियुक्त होण्याची तयारी दर्शविली आहे. या अनुषंगाने आवश्यक प्रशासकीय प्रक्रिया सुरू करण्यात आली असून लवकरच या १८ जणांची नियुक्ती पूर्ण केली जाणार असल्याची माहिती प्रशासनाकडून देण्यात आली आहे.

जिल्हा परिषदेमधील रिक्त पदांवर अनुकंपा तत्त्वावर भरती करण्यासाठी काही महिन्यांपूर्वी मोहीम राबविण्यात आली होती. त्या वेळी ९५ जणांना सेवेत सामावून घेण्यात आले होते. त्यानंतर उर्वरित रिक्त पदांसाठी पुन्हा एकदा प्रक्रिया सुरू करण्यात आली आहे. विशेषत: शिपाई पदाच्या २०० पेक्षा अधिक जागा रिक्त असल्याने वर्ग ‘ड’मधील भरतीला प्राधान्य दिले जात आहे.

दरम्यान, प्रतीक्षा यादीतील २१६ जणांपैकी १९८ जण वर्ग ‘क’मधील पदांसाठी इच्छुक आहेत. वर्ग ‘ड’मध्ये रूजू होण्यास १८ जणांनी तयारी दर्शविली असून त्यातील तीन उमेदवार शिक्षक पात्रता परीक्षा (टीईटी) उत्तीर्ण असल्याने त्यांना शिक्षक पदासाठी नियुक्ती देण्याचा विचार प्रशासन स्तरावर सुरू आहे. मात्र वर्ग ‘क’मधील पदे उपलब्ध झाल्यानंतर उर्वरित १९८ जणांना टप्प्याटप्प्याने संधी दिली जाणार असल्याचे संकेत मिळत आहेत.

सदर नियुक्ती प्रक्रियेची फाईल जिल्हा परिषदेच्या सामान्य प्रशासन विभागाकडून तयार करण्यात येत असून ती मुख्य कार्यकारी अधिकारी यांच्याकडे मंजुरीसाठी सादर केली जाणार आहे. त्यामुळे दीर्घकाळ प्रतीक्षेत असलेल्या अनुकंपाधारक कुटुंबीयांना आता रोजगाराचा मार्ग खुला होण्याची अपेक्षा व्यक्त केली जात आहे.