जि.प.मध्ये प्रशासकीय फेरबदल,
मीनल करणवाल यांची बदली
करिश्मा नायर नव्या मुख्य कार्यकारी अधिकारी
जळगाव (प्रतिनिधी) – जळगाव जिल्हा परिषदेत महत्त्वाचे प्रशासकीय फेरबदल करण्यात आले असून, मुख्य कार्यकारी अधिकारी मीनल करणवाल यांची मुंबई येथील नानाजी देशमुख कृषी संजीवनी प्रकल्पात बदली करण्यात आली आहे. त्यांच्या जागी नाशिक महानगरपालिकेच्या अतिरिक्त आयुक्त करिश्मा नायर यांची नियुक्ती करण्यात आली असून मंत्रालयातून उशिरा रात्री या आदेशांना मंजुरी देण्यात आली.
मीनल करणवाल यांनी गेल्या दीड ते दोन वर्षांच्या कार्यकाळात जिल्हा परिषदेमार्फत अनेक लोकोपयोगी उपक्रम राबवले. ग्रामीण विकास, प्रशासकीय शिस्त आणि योजनांची प्रभावी अंमलबजावणी यामुळे त्यांची कारकीर्द विशेष गाजली. त्यांच्या बदलीनंतर प्रशासकीय वर्तुळात चर्चा रंगली असून त्यांच्या पुढील वाटचालीस शुभेच्छा दिल्या जात आहेत.
दरम्यान, नव्याने नियुक्त झालेल्या करिश्मा नायर या २०२१ बॅचच्या आयएएस अधिकारी असून त्यांनी फॉरेन्सिक सायन्समध्ये बी.एस्सी. शिक्षण पूर्ण केले आहे. यापूर्वी त्यांनी प्रकल्प अधिकारी तथा सहाय्यक जिल्हाधिकारी म्हणून काम पाहिले असून २ एप्रिल २०२५ पासून त्या नाशिक महानगरपालिकेत अतिरिक्त आयुक्त म्हणून कार्यरत होत्या.
जळगाव जिल्ह्यातील ग्रामीण भागातील शिक्षण, आरोग्य आणि पायाभूत सुविधांचा दर्जा उंचावण्याचे मोठे आव्हान आता त्यांच्या समोर असेल. मीनल करणवाल यांनी सुरू ठेवलेला विकासाचा वेग कायम राखत नव्या उपक्रमांना गती देण्याकडे सर्वांचे लक्ष लागून आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
