जुन्या वादातून तरुणाने केली बालकाची हत्या

जुन्या वादातून तरुणाने केली बालकाची हत्या

यावल प्रतिनिधी ;– ६ वर्षीय निरागस बालक मोहम्मद हन्नान खान याच्या खुनाप्रकरणी पोलिसांनी एका संशयित तरुणाला अटक केली आहे. आरोपीने पोलिसांकडे गुन्ह्याची कबुली दिली असून, त्याला न्यायालयात हजर केले जाणार आहे.

येथील बाबूजीपुरा भागातील मोहम्मद हन्नान खान हा ५ सप्टेंबर रोजी ईदच्या दिवशी संध्याकाळपासून बेपत्ता होता. त्याचा शोध परिवार आणि ग्रामस्थ घेत असताना, दुसऱ्या दिवशी (६ सप्टेंबर) सकाळी ११ वाजता त्याचा जळालेल्या अवस्थेतील मृतदेह शेजारच्या घरात दुसऱ्या मजल्यावर आढळून आला.

पोलिसांनी तात्काळ तपास सुरू करून संशयित आरोपी शेख शाहिद शेख बिस्मिल्ला (वय २२) याला ताब्यात घेतले. चौकशीदरम्यान त्याने गुन्हा केल्याची कबुली दिली.

जुन्या वादातून केली हत्या

पोलिसांनी दिलेल्या प्राथमिक माहितीनुसार, जुन्या वादामुळे आरोपीने हन्नानची हत्या केली. आधी गळा दाबून त्याला ठार मारले आणि नंतर पुरावा नष्ट करण्याच्या हेतूने मृतदेह जाळून टाकण्याचा प्रयत्न केला.

या प्रकरणी सुरुवातीला हन्नान बेपत्ता झाल्याची तक्रार दाखल करण्यात आली होती. मात्र, आता हन्नानच्या आजोबांच्या फिर्यादीवरून खुनाचा गुन्हा दाखल करण्यात आला आहे. या घटनेने संपूर्ण यावल तालुका हादरून गेला असून, पोलीस निरीक्षक रंगनाथ धारबळे यांच्या नेतृत्वाखाली यावल पोलीस पुढील तपास करत आहेत.