जुन्या वादातून तरुणावर धारदार शस्त्रांनी हल्ला; चार जणांना अटक

जुन्या वादातून तरुणावर धारदार शस्त्रांनी हल्ला; चार जणांना अटक

जळगाव : जुन्या वादातून हर्षल उर्फ बब्या कुणाल पाटील (वय १८, रा. एकनाथ नगर, रामेश्वर कॉलनी) या तरुणावर रविवारी (१४ सप्टेंबर) दुपारी धारदार शस्त्रांनी प्राणघातक हल्ला करण्यात आला. ही घटना रामेश्वर कॉलनीतील राज शाळेजवळ घडली. याप्रकरणी जखमीचा मित्र नितीन राजेंद्र देशमुख (२१, रा. मंगलपुरी) याने एमआयडीसी पोलिस ठाण्यात फिर्याद दिल्यानंतर चार जणांविरुद्ध गुन्हा दाखल करून अटक करण्यात आली आहे.

गुन्हा दाखल झालेल्यांमध्ये सोहम गोपाल ठाकरे, दिनेश भरत चौधरी, सनी उर्फ फौजी बाळकृष्ण जाधव आणि सागर फुलचंद जाधव उर्फ पाव (सर्व रा. रामेश्वर कॉलनी) या चार जणांचा समावेश आहे. अटक केलेल्यांपैकी सोहम ठाकरे वगळता अन्य तिघे रेकॉर्डवरील गुन्हेगार असून सनी जाधव याच्यावर यापूर्वी ‘एमपीडीए’ची कारवाईही झालेली आहे.

ही घटना घडल्यानंतर पोलिसांनी मध्यरात्री (१५ सप्टेंबर रोजी) अडीच वाजता कारवाई करून चारही आरोपींना अटक केली. पुढील तपास एमआयडीसी पोलीस करीत आहेत.