जैतपीर येथे पिकअप व्हॅन उलटली; ११ प्रवासी जखमी

जैतपीर येथे पिकअप व्हॅन उलटली; ११ प्रवासी जखमी

सहा जणांना धुळे येथे हलवले; मानतेसाठी निघालेल्या प्रवासात अपघात

अमळनेर : तालुक्यातील जैतपीर येथे मानतेसाठी निघालेल्या पिकअप व्हॅनचा अपघात होऊन ११ प्रवासी जखमी झाल्याची घटना ३ एप्रिल रोजी रात्री सुमारे ९.३७ वाजता घडली. यापैकी सहा जणांची प्रकृती गंभीर असल्याने त्यांना पुढील उपचारासाठी धुळे येथे हलविण्यात आले आहे.
जैतपीर येथील वळणाजवळील गतीरोधकाजवळ हा अपघात घडला. संबंधित पिकअप व्हॅनमध्ये सुमारे २५ हून अधिक प्रवासी प्रवास करत होते. दरम्यान, समोरून येणाऱ्या ट्रकला चुकवताना चालकाचे वाहनावरील नियंत्रण सुटले आणि व्हॅन उलटली. त्यामुळे सर्व प्रवासी खाली फेकले गेले.
या अपघातात अंकुश भगवान बागुल (२०), राकेश प्रकाश मोरे (२०), बादल गुलाब भील (१९), संजय बापू मोरे (२२), गणेश ताराचंद भील (२१) आणि मेलसिंग जयसिंग कुवर (२२, सर्व रा. वैजापूर परिसर) हे गंभीर जखमी झाले असून त्यांना धुळे येथे उपचारासाठी रवाना करण्यात आले आहे.

तर विजय दिलीप पवार (२२), राकेश सुखराम भील (२३), रोहित भील (१८, तिघेही रा. वैजापूर), नागेश मंगल भील (२०, रा. ज्योयदा, ता. शिरपूर) आणि सनी श्याम भील (१८, रा. माळीच, ता. शिरपूर) यांना अमळनेर ग्रामीण रुग्णालयात दाखल करण्यात आले आहे.
घटनेची माहिती मिळताच ग्रामस्थ, पोलीस पाटील तसेच सहाय्यक पोलीस निरीक्षक जीभाऊ पाटील, भरत गायकवाड यांच्यासह पोलीस पथक घटनास्थळी दाखल झाले. जखमींना तत्काळ रुग्णालयात हलवून उपचाराची सोय करण्यात आली असून पुढील तपास सुरू आहे.