ज्वेलर्सचे दुकान फोडून चोरट्यांनी लांबविली सहा किलो चांदीसह रोकड

ज्वेलर्सचे दुकान फोडून चोरट्यांनी लांबविली सहा किलो चांदीसह रोकड
भडगाव शहरातील खळबळजनक घटना

भडगाव – प्रतिनिधी

भडगाव शहरातील मुख्य रस्त्यावर असलेल्या नामांकित घोडके ज्वेलर्स दुकानाच्या मागील भिंत फोडून चोरट्यांनी तब्बल सहा किलो चांदी आणि रोख रक्कम लंपास केल्याची घटना उघडकीस आली आहे. दोन दिवसांपासून बंद असलेल्या दुकानावर अज्ञात चोरट्यांनी डोळा ठेवत ही चोरी केल्याने संपूर्ण शहरात खळबळ उडाली आहे.

मिळालेल्या माहितीनुसार, घोडके सराफ दुकानाचे मालक बाहेरगावी गेल्यामुळे दुकान बंद होते. याच संधीचा फायदा घेत चोरट्यांनी मागील बाजूची भिंत फोडून आत प्रवेश केला आणि मोठ्या प्रमाणात चांदी व रोकड लंपास केली. चोरीची माहिती आज सकाळी उघडकीस आली.

शहराच्या मध्यवर्ती भागातच धाडसी चोरी घडल्याने नागरिकांमध्ये भीतीचे वातावरण आहे. गेल्या काही दिवसांपासून गिरणा नदी पात्रातून सुरू असलेला वाळू उपसा, वाढती चोरी आणि पोलिसांची निष्क्रियता यामुळे कायदा-सुव्यवस्थेवर प्रश्नचिन्ह निर्माण झाले आहे. आता भडगाव पोलिसांसमोर चोरांचा शोध घेण्याचे मोठे आव्हान आहे.
या घटनेने शहरातील व्यापारी आणि नागरिक अस्वस्थ झाले असून पोलिस प्रशासनाने तातडीने कारवाई करावी, अशी मागणी केली जात आहे.