झेलम एक्सप्रेसची धडक; अनोळखी व्यक्तीचा जागीच मृत्यू

झेलम एक्सप्रेसची धडक; अनोळखी व्यक्तीचा जागीच मृत्यू
चाळीसगाव : हिरापूर परिसरात रेल्वे लाईन ओलांडताना झेलम एक्सप्रेसच्या धडकेत एका अनोळखी व्यक्तीचा जागीच मृत्यू झाल्याची घटना २४ मार्च रोजी सायंकाळी घडली. या अपघातात मृत व्यक्तीचा शरीराचा चेंदामेंदा झाला आहे.

रेल्वे किमी क्रमांक ३१९/१६-१८ दरम्यान ही घटना घडली असून, ट्रेन क्रमांक ११०७८ झेलम एक्सप्रेसच्या इंजिनचा जोरदार धक्का लागल्याने अंदाजे ३० ते ३५ वर्षीय व्यक्तीचा मृत्यू झाला.

मृताची ओळख अद्याप पटलेली नाही. त्याची उंची सुमारे ५ फूट ५ इंच असून अंगात लाल शर्ट व निळी जिन्स होती. उजव्या हाताच्या मनगटावर बांगडीसारखा टॅटू असल्याचे पोलिसांनी सांगितले.

या प्रकरणी चाळीसगाव रेल्वे पोलीस ठाण्यात अकस्मात मृत्यूची नोंद करण्यात आली असून नागरिकांनी ओळख पटविण्यासाठी पुढे यावे, असे आवाहन करण्यात आले आहे. पुढील तपास पोलीस हवालदार राहुल पाटील करीत आहेत.