ट्रॅव्हल्स कार्यालयासमोरून मोबाईल चोरी; अल्पवयीन चोरटा जेरबंद
जिल्हापेठ पोलिसांची तत्पर कारवाई; ९६ हजारांचे चार मोबाईल हस्तगत
जळगाव : शहरातील आकाशवाणी चौक परिसरात ट्रॅव्हल्स कार्यालयासमोर ठेवलेल्या कुरीयर पार्सलमधून मोबाईल चोरी करणाऱ्या अल्पवयीन चोरट्याला जिल्हापेठ पोलिसांनी ताब्यात घेत मोठी कारवाई केली आहे. या प्रकरणात पोलिसांनी चोरलेले चार मोबाईल हस्तगत केले असून, एकूण मालमत्तेची किंमत सुमारे ९६ हजार ९९६ रुपये आहे.
आकाशवाणी चौकातील श्री स्वामी ट्रॅव्हल्स कार्यालयासमोर ठेवलेल्या कुरीयर बॉक्समधून पाच मोबाईल चोरीला गेल्याची घटना घडली होती. याप्रकरणी गुन्हा दाखल होताच जिल्हापेठ पोलिसांनी तपासाची चक्रे वेगाने फिरवली.
प्रभारी सहाय्यक पोलीस निरीक्षक अनिल वाघ यांच्या मार्गदर्शनाखाली गुन्हे शोध पथकाने तांत्रिक विश्लेषणाच्या आधारे तपास करत संशयिताचा माग काढला. पोहेकॉ महेंद्र पाटील, नरेश सोनवणे, संतोष सोनवणे, तेजस मराठे, प्रवीण जाधव, प्रशांत लाड, चंद्रकांत पाटील यांच्या पथकाने संबंधित अल्पवयीन मुलाला ताब्यात घेतले.
कसून चौकशीत त्याने गुन्ह्याची कबुली दिली असून, त्याच्याकडून चोरीस गेलेले चार मोबाईल जप्त करण्यात आले आहेत. पुढील तपास पोलिसांकडून सुरू आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
