डायमंड पार्कमध्ये घरफोडी; २ लाखांचा ऐवज लंपास

डायमंड पार्कमध्ये घरफोडी; २ लाखांचा ऐवज लंपास

दरवाजा तोडून कपाटे फोडली; अज्ञात चोरट्याचा शोध सुरू

भुसावळ (प्रतिनिधी) : शहरातील डायमंड पार्क परिसरात बंद घर फोडून अज्ञात चोरट्याने सोन्या-चांदीच्या दागिन्यांसह रोख रक्कम असा सुमारे २ लाख १० हजार रुपयांचा ऐवज लंपास केल्याची घटना उघडकीस आली आहे. या प्रकरणी बाजारपेठ पोलीस ठाण्यात गुन्हा दाखल करण्यात आला असून पोलिसांनी चोरट्याच्या शोधासाठी तपास सुरू केला आहे.

डायमंड पार्क परिसरातील रहिवासी शेख इस्ताक शेख मोहम्मद (वय ४०) हे मजुरी करून उदरनिर्वाह करतात. ३१ मार्च रोजी सायंकाळी ते वरणगाव येथे लग्न समारंभासाठी गेले होते. घर बंद असल्याची संधी साधून अज्ञात चोरट्याने मुख्य दरवाजा तोडून घरात प्रवेश केला. त्यानंतर हॉल व बेडरूममधील सामानाची उचकापाचक करत बेडरूममधील लोखंडी कपाट व तीन लॉकर फोडण्यात आले.

चोरट्यांनी ६ ग्रॅम वजनाची सोन्याची अंगठी, २० भार वजनाचे चांदीचे पायातील कडे तसेच १ लाख ७० हजार रुपयांची रोख रक्कम असा एकूण २ लाख १० हजार रुपयांचा ऐवज लंपास केला. ही घटना ३१ मार्च सायंकाळी ५ ते १ एप्रिल दुपारी ४ या कालावधीत घडल्याचा अंदाज पोलिसांनी व्यक्त केला आहे.

याप्रकरणी ७ एप्रिल रोजी बाजारपेठ पोलीस ठाण्यात गुन्हा दाखल करण्यात आला असून पोलीस निरीक्षक राहुल वाघ यांच्या मार्गदर्शनाखाली सहाय्यक पोलीस निरीक्षक नीलेश देशमुख पुढील तपास करीत आहेत.