डॉ. बाबासाहेब आंबेडकर मार्केटमध्ये स्वच्छता अभियान
महापालिकेतर्फे आ. राजूमामा भोळे, महापौर दीपमाला काळे यांच्या निर्देशानुसार कार्यवाही
जळगाव (प्रतिनिधी): शहराला स्वच्छ आणि सुंदर बनवण्यासाठी महापौर दीपमाला काळे यांनी आक्रमक पाऊल उचलले असून, त्यांच्या पुढाकाराने ‘मार्केट स्वच्छता अभियान’ वेगाने राबवले जात आहे. या अभियानांतर्गत आज, ८ एप्रिल रोजी शहरातील डॉ. बाबासाहेब आंबेडकर मार्केटमध्ये विशेष स्वच्छता मोहीम राबवून परिसर चकाचक करण्यात आला.
आ. राजूमामा भोळे, महापौर दीपमाला काळे यांनी दिलेल्या निर्देशानुसार ही मोहीम राबवण्यात आली. ‘माझे मार्केट, स्वच्छ मार्केट’ हे ब्रीदवाक्य समोर ठेवून राबवण्यात आलेल्या या मोहिमेत खुद्द महापौरांनी दुकानदारांना आवाहन केले आहे.
यावेळी महापौर दीपमाला काळे यांनी व्यापाऱ्यांना प्रसिद्धी पत्रकाद्वारे माहिती दिली आहे. “प्रत्येक दुकानदाराने आपल्या दुकानाबाहेर कचराकुंडी ठेवणे बंधनकारक आहे. मार्केटमध्ये येणाऱ्या नागरिकांना देखील स्वच्छतेबाबत वारंवार प्रोत्साहित करावे. सर्वांनी मिळून प्रयत्न केल्यास आपले मार्केट आदर्श आणि स्वच्छ मार्केट ठरेल,” असे आवाहन त्यांनी केले आहे.
या स्वच्छता मोहिमेत एकूण २० महिला आणि ८ पुरुष कर्मचाऱ्यांनी परिश्रम घेऊन संपूर्ण मार्केट परिसराची साफसफाई केली. याप्रसंगी महापालिकेचे सहाय्यक आयुक्त उदय पाटील, मुख्य स्वच्छता समन्वयक रमेश कांबळे, मुख्य स्वच्छता निरीक्षक मुकेश पाटील, तसेच रूपेश भालेराव, वार्ड मुकादम विशाल चांगरे, नितीन जावळे आणि बीव्हीजी सुपरवायझर संदीप शर्मा यांची प्रमुख उपस्थिती होती. शहरातील इतर बाजारपेठांमध्येही टप्प्याटप्प्याने हे अभियान राबवले जाणार असल्याचे प्रशासनातर्फे सांगण्यात आले आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
