डॉ. बेंडाळे महिला महाविद्यालयात पालक सभा संपन्न..

डॉ. बेंडाळे महिला महाविद्यालयात पालक सभा संपन्न..

जळगाव(20) : येथील डॉ. अण्णासाहेब जी. डी. बेंडाळे महिला महाविद्यालयात कार्यरत पालक- शिक्षक संघाच्या वतीने “पालक सभेचे” आयोजन महाविद्यालयातील धांडे हॉल येथे आज रोजी करण्यात आले. या सभेच्या अध्यक्षस्थानी महाविद्यालयाचे प्राचार्य डॉ.व्ही. जे. पाटील हे उपस्थित होते. याप्रसंगी विचारमंचावर उपप्राचार्य डॉ. पी. एन. तायडे व उपप्राचार्य डॉ. सत्यजित साळवे हे देखील उपस्थित होते.
सभेच्या प्रारंभी पालक शिक्षक संघाच्या प्रमुख डॉ. सुजाता गायकवाड यांनी नवीन राष्ट्रीय शिक्षण धोरणानुसार महाविद्यालयाने सुरू केलेले विविध अभ्यासक्रम, विद्यार्थिनींचा विविध उपक्रम व स्पर्धांमधील सहभाग, सभेचा अजेंडा आपल्या प्रास्ताविकातून मांडला. त्यानंतर महाविद्यालयात विद्यार्थिनींसाठी उपलब्ध असलेल्या सोयी-सुविधा, विज्ञान तंत्रज्ञान विभाग-नवी दिल्ली यांच्याकडून महाविद्यालयास संशोधनासाठी प्राप्त झालेले विशेष अनुदान, नियमित अभ्यासक्रमांसोबतच ब्युटी थेरपी व फॅशन डिझायनिंग या कौशल्य आधारित अभ्यासक्रमाची माहिती, महाविद्यालयास प्राप्त झालेले राज्यस्तरीय व राष्ट्रीय स्तरावरील पुरस्कार, स्पर्धा परीक्षा मार्गदर्शन केंद्र, स्वातंत्र्याचा अमृत महोत्सव अंतर्गत घेतलेले विविध कार्यक्रम, विद्यार्थिनींसाठी आयोजित फॅशन-शो, महाविद्यालयास स्वायत्तता मिळाल्यामुळे महाविद्यालयाने सुरू केलेले रोजगाराभिमुख अभ्यासक्रम,  संशोधन क्षेत्रात विद्यार्थिनी व प्राध्यापक यांनी प्राप्त केलेले यश, उत्कृष्ट महाविद्यालय म्हणून कवयित्री बहिणाबाई चौधरी उत्तर महाराष्ट्र विद्यापीठ यांनी डॉ. बेंडाळे महाविद्यालयाचा केलेला गौरव, इत्यादी बाबत सविस्तर माहितीचे सादरीकरण पीपीटीच्या माध्यमाने प्रा. डॉ. सौ. मनीषा पाटील यांनी याप्रसंगी केले.
या सभेत पालक प्रतिनिधी सौ. ज्योती बर्गे यांनी महाविद्यालयात विद्यार्थिनींसाठी उपलब्ध सोयी सुविधा व शिक्षकांचे उत्कृष्ट मार्गदर्शन मिळत असल्याबद्दल समाधान व्यक्त केले.याप्रसंगी दिल्ली येथे आयोजित ‘थल सैनिक कॅम्प’ मध्ये महाराष्ट्रातील पाचपैकी एक सहभागी एन.सी.सी. कॅडेट महाविद्यालयाची विद्यार्थिनी कु. ललिता मोरसिंग राठोड हिचा या कॅम्पमध्ये सुवर्णपदक प्राप्त केल्याबद्दल तिचा तिच्या पालकांसमवेत विशेष सन्मान महाविद्यालयाचे प्राचार्य डॉ. व्ही.जे.पाटील यांच्या हस्ते करण्यात आला.
‘महाविद्यालयाच्या विद्यार्थिनींनी नियमित अभ्यासक्रमांसोबतच एन.सी.सी., एन.एस.एस.,कला मंडळ आयोजित विविध उपक्रमांमध्ये सहभागी झाल्यामुळे त्यांची व्यक्तिमत्व उभारणी होते. तसेच महाविद्यालयाने सलग “नॅक” संस्थेकडून प्राप्त केलेल्या “ए” ग्रेडचे श्रेय हे महाविद्यालय व्यवस्थापन मंडळ, शिक्षकवृंद, विद्यार्थिनी यांच्यासह पालकांना देखील जाते, असे प्रतिपादन महाविद्यालयाचे प्राचार्य डॉ. व्ही. जे. पाटील यांनी आपल्या अध्यक्षीय मनोगतातून व्यक्त केले.
या पालक सभेचे सूत्रसंचालन डॉ. प्रशांत पाटील यांनी तर आभार डॉ. मिताली अहिरे यांनी मानले. पालक सभा यशस्वीतेसाठी पालक शिक्षक संघाच्या सर्व समिती सदस्यांनी प्रयत्न केले.