तंत्र्यदिनाच्या भाषणात संघाचे कौतुक म्हणजे स्वातंत्र्यलढ्याचा अपमान’: असदुद्दीन ओवैसी

स्वातंत्र्यदिनाच्या भाषणात संघाचे कौतुक म्हणजे स्वातंत्र्यलढ्याचा अपमान’: असदुद्दीन ओवैसी

नवी दिल्ली: भारताच्या ७९ व्या स्वातंत्र्यदिनी पंतप्रधान नरेंद्र मोदी यांनी लाल किल्ल्यावरून केलेल्या भाषणात राष्ट्रीय स्वयंसेवक संघाचे (RSS) कौतुक केले. यावरून आता विरोधकांनी, विशेषतः एआयएमआयएमचे प्रमुख असदुद्दीन ओवैसी यांनी तीव्र टीका केली आहे.

ओवैसींची संघाच्या भूमिकेवर टीका

ओवैसी यांनी आपल्या ‘एक्स’ (पूर्वीचे ट्विटर) हँडलवर म्हटले आहे की, “स्वातंत्र्यदिनाच्या भाषणात संघाचे कौतुक करणे हा स्वातंत्र्यलढ्याचा अपमान आहे.” त्यांनी आरोप केला की, “आरएसएस आणि त्यांचे वैचारिक सहकारी ब्रिटिशांचे पायदळ सैनिक म्हणून काम करत होते आणि त्यांनी कधीही स्वातंत्र्यलढ्यात भाग घेतला नाही. त्यांनी ब्रिटिशांना विरोध करण्यापेक्षा गांधींचा जास्त द्वेष केला.”

ओवैसी यांनी देशाला स्वातंत्र्य दिनाच्या शुभेच्छा देताना सांगितले की, “पंतप्रधानांनी पुन्हा एकदा आपल्याला खरा इतिहास वाचणे आणि देशाच्या खऱ्या नायकांचा आदर करणे किती महत्त्वाचे आहे, हे दाखवून दिले. जर आपण हे केले नाही, तर लवकरच भ्याडपणा शौर्य म्हणून दाखवला जाईल.” आरएसएस आपल्या स्वातंत्र्यसैनिकांना प्रेरणा देणाऱ्या समावेशक राष्ट्रवादाच्या मूल्यांना नाकारण्याचे काम करते, असेही ते म्हणाले.

‘चीनपेक्षा मोठा धोका देशाच्या आतच’

ओवैसी यांनी पुढे म्हटले की, हिंदुत्ववादी विचारसरणी बहिष्कारावर विश्वास ठेवते आणि ती आपल्या संविधानाच्या मूल्यांच्या विरुद्ध आहे. “पंतप्रधान नागपूरला जाऊन स्वयंसेवक म्हणून संघाचे कौतुक करू शकले असते, पण पंतप्रधान असताना त्यांना लाल किल्ल्यावरून असे का करावेसे वाटले?” असा सवाल त्यांनी केला.

चीन हा भारतासाठी सर्वात मोठा धोका आहे, परंतु त्याहूनही मोठा धोका देशाच्या आत आहे, तो म्हणजे संघ परिवार पसरवत असलेला द्वेष आणि फूट, असे गंभीर आरोप त्यांनी केले. आपल्या स्वातंत्र्याचे खऱ्या अर्थाने रक्षण करायचे असेल तर अशा शक्तींना पराभूत केले पाहिजे, असे मत ओवैसींनी व्यक्त केले.