तरुणाचा नेव्हरे धरणात बुडून मृत्यू

तरुणाचा नेव्हरे धरणात बुडून मृत्यू

जळगाव प्रतिनिधी नेव्हरे धरणात पोहताना पाण्याचा अंदाज न आल्यानेजळगाव तालुक्यातील शिरसोली प्र. नं. गावातील ३१ वर्षीय तरुणाचा बुडून मृत्यू झाल्याची दुर्दैवी घटना बुधवारी, १५ ऑक्टोबर रोजी घडली. या घटनेने शिरसोली गावात हळहळ व्यक्त होत असून, एमआयडीसी पोलीस ठाण्यात अकस्मात मृत्यूची नोंद करण्यात आली आहे.

मयत तरुणाचे नाव शरद राजाराम सुने (वय ३१, रा. शिरसोली प्र. नं.) असे आहे. शरद हा मजुरी करून आपल्या आई-वडिलांच्या कुटुंबाचा उदरनिर्वाह करत होता. घरचा तो एकुलता एक मुलगा असल्याने त्याच्या मृत्यूने सुने कुटुंबावर दुःखाचा डोंगर कोसळला आहे.

बुधवार सकाळी सुमारे सातच्या सुमारास शरद आपल्या दोन मित्रांसह — भिका वसंत शिंपी (वय ४५) आणि अशोक सखाराम भिल (वय ५०) — नेव्हरे धरणात पोहण्यासाठी गेला होता. पोहत असताना अचानक खोल पाण्यात गेल्याने शरद बुडायला लागला. हा प्रकार पाहून घाबरलेल्या त्याच्या मित्रांनी गावाकडे धाव घेत पोलीस पाटील श्रीकृष्ण बारी यांना माहिती दिली. बातमी पसरताच ग्रामस्थ मोठ्या संख्येने धरणाजवळ पोहोचले आणि पटाईत पोहणाऱ्यांच्या मदतीने शरदला बाहेर काढण्यात आले.

शरदला तातडीने जळगाव येथील शासकीय वैद्यकीय महाविद्यालयात दाखल करण्यात आले; मात्र वैद्यकीय अधिकाऱ्यांनी तपासणीनंतर त्याला मृत घोषित केले. रुग्णालयात शरदच्या कुटुंबीयांचा झालेला आक्रोश हृदयद्रावक होता.

या घटनेची नोंद एमआयडीसी पोलीस स्टेशनमध्ये घेण्यात आली असून, पोलीस पुढील तपास करीत आहेत.