तांत्रिक विश्लेषणावर एटीएम चोरट्यांचा शोध सुरू

तांत्रिक विश्लेषणावर एटीएम चोरट्यांचा शोध सुरू

सत्यम प्लाझातील एटीएम चोरी प्रकरण; ७ लाखांची रोकड लंपास, पोलिसांची विविध पथके तपासात

जळगाव : शहरातील मध्यवर्ती भागातून एटीएम मशीन चोरून नेणाऱ्या टोळीचा पोलिसांकडून कसून शोध सुरू असून तांत्रिक विश्लेषणाच्या आधारे तपासाला वेग देण्यात आला आहे. या धाडसी चोरीमुळे शहरात खळबळ उडाली असून चोरटे स्थानिक असण्याची शक्यता पोलिसांनी व्यक्त केली आहे.
पोलन पेठ परिसरातील सत्यम प्लाझामधील एका स्मॉल फायनान्स बँकेच्या एटीएमला दोर बांधून गुरुवारी मध्यरात्री चोरट्यांनी मशीनच पळवून नेले. नंतर हे एटीएम तालुक्यातील मन्यारखेडा शिवारात सापडले; मात्र त्यातील सुमारे ७ लाख रुपयांची रोकड चोरट्यांनी लंपास केली होती. ही टोळी भुसावळ रस्त्याने पळाल्याचे समोर आले असून ते पुढे बुलडाणा किंवा मध्यप्रदेशाच्या दिशेने गेल्याची शक्यता तपासात पाहिली जात आहे.
चोरीपूर्वी वाहनही लंपास
या घटनेपूर्वी चोरट्यांनी शनिपेठ पोलीस ठाण्याच्या हद्दीतून मालवाहू वाहन चोरी केल्याचे उघड झाले आहे. त्यानंतर नेरीनाका मार्गे कोंबडी बाजार परिसरात येऊन त्यांनी एटीएम उचलून नेले. संबंधित परिसर व्यावसायिक असल्याने मोठा आवाज होऊनही घटना तत्काळ लक्षात आली नाही.

सीसीटीव्ही फुटेजवरून तपासाला दिशा
संपूर्ण घटना सीसीटीव्हीत कैद झाली असून त्यातील संशयितांचा पेहराव आणि हालचाली पाहता ते स्थानिक असण्याचा अंदाज व्यक्त केला जात आहे. त्यामुळे पोलिसांनी रेकॉर्डवरील गुन्हेगारांची माहिती तपासण्यास सुरुवात केली आहे.

दरम्यान, शहर पोलीस ठाण्यासह स्थानिक गुन्हे शाखेची पथके विविध ठिकाणी रवाना झाली असून तांत्रिक माहितीच्या आधारे संशयितांचा शोध घेतला जात आहे. लवकरच आरोपींचा छडा लागेल, असा विश्वास पोलीस सूत्रांनी व्यक्त केला आहे.