दिराने केला भावजयीवर अत्याचार ; तिघांविरुद्ध गुन्हा

दिराने केला भावजयीवर अत्याचार ; तिघांविरुद्ध गुन्हा

जळगाव प्रतिनिधी घरात कोणी नसल्याचा फायदा घेत दिराने भावजयीवर अत्याचार केल्याची खळबळजनक घटना जळगावात घडली आहे. पीडित विवाहितेने हा प्रकार पती आणि सासूला सांगितला असता, त्यांनी उलट तिला धमकी दिली की, “हा प्रकार कोणाला सांगितलास तर तुझे आयुष्य उद्ध्वस्त करू.” गेल्या वर्षभरापासून हा अत्याचार सुरू असताना १० ऑक्टोबर २०२५ रोजी दिराने पुन्हा तिचा विनयभंग केला. यामुळे त्रस्त झालेल्या विवाहितेच्या तक्रारीवरून रामानंद नगर पोलिसांनी दिरासह पती आणि सासूविरुद्ध गुन्हा दाखल केला आहे.

रामानंद नगर पोलिस ठाण्याच्या हद्दीत राहणारी विवाहिता ऑगस्ट २०२४ मध्ये घरी एकटी असताना तिच्या दिराने तिच्यावर अत्याचार केला. पीडितेने लगेच पती आणि सासूस ही बाब सांगितली, पण त्यांनी तिला मदत करण्याऐवजी, “अशा गोष्टी सांगू नको, राहायचे असेल तर राहा, नाहीतर निघून जा,” असे सुनावले आणि कोणाला सांगितल्यास आयुष्य उद्ध्वस्त करण्याची धमकी दिली.

पती आणि सासूच्या धमकीमुळे विवाहिता वर्षभर हा अत्याचार सहन करत राहिली. मात्र, १० ऑक्टोबर २०२५ रोजी दिराने पुन्हा अश्लील कृत्य करत तिचा विनयभंग केला. यानंतर तिने धैर्याने रामानंद नगर पोलिस ठाण्यात तक्रार दाखल केली. पोलिसांनी दिरासह पती आणि सासू यांच्याविरुद्ध गुन्हा नोंदवला असून, तपास सुरू आहे.