दिल्लीला केळी पाठवून व्यापाऱ्याची ३.५७ लाखांची फसवणूक

दिल्लीला केळी पाठवून व्यापाऱ्याची ३.५७ लाखांची फसवणूक

बनावट ट्रान्झॅक्शन स्क्रीनशॉट पाठवून आरोपीचा बनाव; यावलमध्ये गुन्हा दाखल

यावल (प्रतिनिधी):– दिल्ली येथे केळी पाठवून त्याचे पैसे न देता, बनावट बँक व्यवहारांचे स्क्रीनशॉट पाठवून केळी व्यापाऱ्याची तब्बल ३ लाख ५७ हजार ५२१ रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी यावल पोलीस ठाण्यात गुन्हा दाखल करण्यात आला असून तपास सुरू आहे.
यावल तालुक्यातील निमगाव येथील केळी व्यापारी ज्ञानेश्वर नामदेव महाजन (वय ५८) यांच्याशी ‘शुभम केला एजन्सी’ नावाने संपर्क साधणाऱ्या अज्ञात व्यक्तीने विश्वास संपादन करत दिल्लीतील पंजाबी बाग येथील ‘शिवनारायण भाईजी केला स्टोअर’ येथे केळी पाठवण्यास सांगितले.

दोन ट्रकमधून लाखोंचा माल रवाना
आरोपीच्या सांगण्यावरून महाजन यांनी २३ ते २६ मार्च २०२६ दरम्यान दोन ट्रकद्वारे केळी पाठवली. यामध्ये आयशर ट्रक (RJ.11.GD.3736) मधून १ लाख ६२ हजार ५०० रुपयांची १५८.५० क्विंटल केळी, तर ट्रॉला ट्रक (RJ.11.GD.3847) मधून १ लाख ९५ हजार २१ रुपयांची १६४.२० क्विंटल केळी पाठवण्यात आली.

बनावट व्यवहार दाखवून फसवणूक

माल पाठवल्यानंतर आरोपीने तो दिलेल्या पत्त्यावर न उतरवता दुसरीकडे वळवला. त्यानंतर पैशांची मागणी केल्यावर ‘फिनो पेमेंट’ ॲपद्वारे खोटा व्यवहार दाखवून ‘एसबीआय’ बँकेत चेक जमा केल्याचा बनाव केला. यासंबंधीचे बनावट स्क्रीनशॉट व्हॉट्सॲपवर पाठवून विश्वास ठेवण्यास भाग पाडले. मात्र प्रत्यक्षात महाजन यांच्या खात्यात कोणतीही रक्कम जमा झाली नाही.

फसवणूक झाल्याचे लक्षात येताच महाजन यांनी यावल पोलीस ठाण्यात तक्रार दाखल केली. पोलिसांनी गुन्हा नोंदवून तपास सुरू केला असून, पोलीस नाईक वसीम तडवी पुढील तपास करत आहेत.
या घटनेमुळे व्यापारी वर्गात खळबळ उडाली असून, अनोळखी व्यक्तींशी व्यवहार करताना योग्य पडताळणी करण्याचे आवाहन पोलिसांकडून करण्यात आले आहे.